بەكشيننىڭ كەزەكتى بولجامى: قاڭتار ايىنىڭ سوڭىندا الماتىدا دەرت كۇشەيۋى مۇمكىن

الماتى قالاسىنىڭ باس سانيتار دارىگەرى جانداربەك بەكشين بەيسەنبىدەگى بريفينگتە قاڭتار ايىنىڭ  اياعىنا قاراي كوروناۆيرۋستىڭ كەڭىنەن تارالۋىنا بايلانىستى قالادا ەپيدەميولوگيالىق جاعداي ناشارلايدى دەگەن بولجامىن ءبولىستى.

بەكشين ۇسىنعان مالىمەتكە قاراعاندا، ىندەتتىڭ ەكىنشى تولقىنى باستالعان بىلتىرعى قازان ايىنان بەرى قالادا كوروناۆيرۋس جۇقتىرعاندار سانى 14 ەسە وسكەن.

– قىركۇيكتە ينفەكتسيا جۇققان 165 ناۋقاس انىقتالدى، قازاندا – 360, قاراشادا – 1399, جەلتوقساندا 2256 ادامعا جەتتى. قاڭتاردىڭ العاشقى جەتى كۇنى 700-دەن اسا ادام تىركەلدى. قاڭتارعا جاسالعان بولجام بويىنشا، ايدىڭ اياعىنا دەيىن 4500-گە جەتۋى مۇمكىن، – دەدى قالانىڭ باس سانيتار-دارىگەرى.

ونىڭ مالىمدەۋىنشە، «سارى ايماقتا» ەنگەن قالاداعى ناۋقاستاردىڭ 44%-ى قوعامدىق ورىنداردا، 28%-ى وتباسىندا جۇقتىرعان. سونداي-اق، وتكەن ەكى اپتادا ۆيرۋس جۇقتىرعانى انىقتالعانداردىڭ 35% – 20-39 جاس، تاعى 33% – 40 پەن 59 جاس ارالىعىنداعى ادامدار.

ءباسپاسوز جيىنىنا قاتىسقان قوعامدىق دەنساۋلىق باسقارماسىنىڭ باستىعى ناريمان تابىنباەۆتىڭ دەرەگىنشە، قازىرگى تاڭدا تاۋلىگىنە ورتا ەسەپپەن 50 شاقتى ناۋقاس اۋرۋحاناعا جاتقىزىلىپ جاتىر. جالپى ەمدەۋ بولىمدەرىندە 1261, رەانيماتسيادا 110  توسەك-ورىن بار، تاعى 5145 ورىن رەزەرۆكە دايىندالعان كورىنەدى.

دەر كەزىندە قامدانا الماعان قالادا «ماۋسىم-شىلدە قىرعىنىندا» 72 ءموبيلدى بريگادا جۇمىس ىستەسە، بۇگىن قاتارى 298-گە جەتكىزىلىپتى.

بىلتىر 16 جەلتوقساندا «Centre for Clinical Medicine and Research» جشس، «№4 قالالىق ەمحانا» جانە «ميپو»جەكە ورتالىعى اراسىندا كونسورتسيۋم قۇرىلعان. ناتيجەسىندە  وتاندىق QAZCOV-IN ۆاكتسيناسىن ءىىى فازا دەڭگەيىندە، ياعني كلينيكالىق سىناقتان وتكىزۋگە ءوتىنىم بەرگەن 1,5 مىڭ ەرەسەك ادامنىڭ 909-ى ەكپە العان.

الماتى قالاسىندا كوروناۆيرۋس جۇقتىرعاندار 19 مىڭنان جانە وسىعان ۇقساس پنەۆمونياعا شالدىققاندار 5 مىڭنان استى.

"The Qazaq Times"