اقش-تا كوروناۆيرۋس ۆاكتسيناسىن شەنەۋنىكتەر قابىلداپ جاتىر

اقش-تا كوروناۆيرۋسقا قارسى ەكپە ەگۋ باستالدى. ءبىرىنشى كەزەڭدە ۆاكتسينا 6 ميلليون ادامعا سالىنادى. ەكپەنىڭ قاۋىپسىزدىگىنە كۇمان كەلتىرمەۋ ءۇشىن امەريكانىڭ بىرقاتار سەناتورلارى، سايلاۋدا جەڭىسكە جەتكەن دجو بايدەن Moderna ۆاكتسيناسىن العاشقىلاردىڭ ءبىرى بولىپ قابىلدادى. 

ەمدىك تيىمدىلىگى 94% كورسەتكەن Moderna كومپانياسىنىڭ پرەپاراتىن قولدانۋعا وتكەن اپتادا رۇقسات بەرىلگەن بولاتىن. بۇل – قۇراما شتاتتاردا ۆيرۋسقا قارسى ماقۇلدانعان ەكىنشى ۆاكتسينا. وسىنىڭ الدىندا اقش-تىڭ ازىق-تۇلىك جانە ءدارى-دارمەكتىڭ ساپاسىن باقىلاۋ باسقارماسى جەرگىلىكتى Pfizer ەكپەسىن سالۋعا كۋالىك بەرگەن ەدى.

امەريكادا ۆاكتسينانىڭ قاۋىپسىزدىگىنە كۇمان كەلتىرمەۋ ءۇشىن ەكپە قابىلداۋدى ءبىرىنشى بوپ ۇكىمەتتەگىلەر باستاعان. بۇعان دەيىن ۆيتسە-پرەزيدەنت مايك پەنس، كونگرەسس دەپۋتاتى نەنسي پەلوسي سىندى بىرقاتار ساياساتكەر جۇرتتىڭ كوزىنشە كوروناۆيرۋس ەكپەسىن سالدىرتتى. وسىلايشا، ولار امەريكالىقتاردى ەگۋدەن باس تارتپاۋعا ۇندەدى.

كەشە دجو بايدەنگە ءدارى ەگۋ پروتسەسى ۇلتتىق تەلەارنادان تىكەلەي ەفيردە كورسەتىلدى. پروتسەستەن كەيىن ول جاپپاي ۆاكتسيناتسيالاۋ باعدارلاماسىنىڭ باستالۋىنا سەبەپكەر بولعان دونالد ترامپ اكىمشىلىگىنىڭ جۇمىسىن جوعارى باعالادى. ازىرگە، اقش-تىڭ قازىرگى پرەزيدەنتى دونالد ترامپ ۆيرۋسقا قارسى ەكپە سالدىرتقان جوق.

اقش-تىڭ ۆيتسە-پرەزيدەنتى مايك پەنس. فوتو: ۆۆس

ال قازاقستاندا ۆاكتسينا ەگۋ اقپاندا باستالماق. ۇكىمەت باسشىسى اسقار ءماميننىڭ ايتۋىنشا، كوروناۆيرۋسقا قارسى ەكپەنى ءبىرىنشى كەزەكتە دارىگەرلەر، مۇعالىمدەر مەن ءتارتىپ ساقشىلارى قابىلدايدى. سوسىن ەگدە جاستاعىلار مەن سوزىلمالى اۋرۋى بار ادامدارعا دا ەگىلەدى.

الەم بويىنشا سىناقتان ءساتتى وتكەن Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسىن سالۋدى باستاعان ەلدەر قاتارىندا ۇلىبريتانيا، اقش جانە كانادا بار.

ۆيرۋسقا قارسى ەكپەگە ءبىرىنشى بولىپ ۇلىبريتانيا بيلىگى رۇقسات بەردى. 9 جەلتوقساندا بريتانيادا Pfizer كومپانياسى وندىرگەن ۆاكتسينانى العاشقى بولىپ 90 جاستاعى مارگارەت كينان ەسىمدى بريتاندىق ايەل قابىلدادى. ەلدىڭ دەنساۋلىق ساقتاۋ ءمينيسترى مەتت حانكوكتىڭ ايتۋىنشا، ەكپەنىڭ 40 ميلليون دوزاسىنا تاپسىرىس بەرىلگەن.

امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان استام وڭ ناتيجە كورسەتكەن. ال وسكفورد ۋنيۆەرسيتەتى مەن AstraZeneca كومپانياسى وندىرگەن كوروناۆيرۋسقا قارسى ۆاكتسينا 70% تيىمدىلىك كورسەتتى.

ۆيرۋسقا قارسى ەكپە ەگۋ باستالعاننان كەيىن، ۇلىبريتانيادا COVID-19-دىڭ مۋتاتسياعا ۇشىراعان ءتۇرى انىقتالدى. وسىعان بايلانىستى بريتانيادا ءتورتىنشى دەڭگەيلى لوكداۋن ەنگىزىلدى. سونىمەن قاتار، مۋتاتسياعا ۇشىراعان ۆيرۋس نيدەرلاند، دانيا، اۋستراليا جانە وڭتۇستىك افريكادا دا تىركەلدى. مالىمەتتەر بويىنشا، ۆيرۋستىڭ جاڭا شتامى ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى.

"The Qazaq Times"