قىتايداعى اسقىنعان ۇلتشىلدىق باتىس ەلدەرىن الاڭداتۋدا

قىتايدىڭ ۋحان قالاسىندا باستالعان ىندەت قىتايعا جانە الەمگە ۇلكەن وزگەرىستەر الىپ كەلدى. ارينە، الەمدە ەكونوميكالىق دامۋ ينەرتسياسى السىرەدى، تۇتىنۋ ازايىپ، جەزكىزۋ قىزمەتى بولىپ كورمەگەن قيىندىقتارعا تاپ بولدى، وسىنىڭ ءبارى الەمنىڭ ءوندىرۋشىسى اتالعان قىتاي ءۇشىن ۇلكەن سوققى بولدى. بىراق، ىندەتتىڭ كەيبىر جاناما اسەرلەرى قىتايعا وڭ اسەرىن تيگىزگەنىن ايتپاي كەتۋگە بولمايدى.

ىندەتتىڭ شىرماۋىنان الدىمەن شىعىپ العان قىتاي وزگە باسەكەلەستەرى ىندەتپەن كۇرەسىپ جاتقاندا ءوزىنىڭ ءتۇبىرلى مۇددەلەرىنە ساياتىن بىرقاتار قادامداردى ارتىعىمەن اتتاپ ۇلگەردى. وعان قوسا، قىتاي كوممۋنيستىك رەجيمى ءوزىنىڭ ىندەتكە قارسى ناتيجەلى كۇرەسى ارقىلى الەمگە «قىتايلىق باسقارۋ ءتارتىبىن» ناسيحاتتاۋدىڭ ورايى ەتۋگە تىرىستى.

2015 جىلعا دەيىن قىتايدىڭ ەكونوميكاسى قارقىندى دامىپ، بارلىق جاقتا دامۋدىڭ تىڭ تەبىنىن كورسەتىپ كەلە جاتقانىنا قاراماستان، ەل ىشىندە كوممۋنيستىك رەجيمگە دەگەن قارسىلىق كوڭىل-كۇيدى باسا الماعان ەدى. قىتايدىڭ قازىرگى باسشىسى شي جينپيڭ بيلىككە كەلگەننەن كەيىن بيلىك پارتياسىن حالىققا جاقىنداتۋدىڭ بىرقاتار شارالارىن جاسادى، ونىڭ سىبايلاس جەمقورلىققا قارسى كۇرەسى دە باسىم كوپ قىتايلىقتاردىڭ كوڭىلىنەن شىقتى. وعان كوروناۆيرۋسقا قارسى كۇرەستەگى قىتاي رەجيمىنىڭ بەلگىلى ارتىقشىلىقتارى قوسىلىپ، قىتايلىقتاردىڭ كوممۋنيستىك جۇيەگە دەگەن سەنىمدەرى قايتا جوعارىلادى.

قىتاي باسشىسى شي ءوزىنىڭ بيلىك ءداۋىرىنىڭ باعدارى رەتىندە «قىتاي ارمانى» اتتى ۇلتتىق ستراتەگيا قابىلدادى. سوعان ساي قىتاي عاسىردىڭ ورتا شەنىندە تەڭدەسسىز مەملەكەتكە اينالۋى كەرەك. بۇل ارينە اسقىنعان ۇلتشىلدىق ماستىعىنداعى قىتايلىقتاردىڭ كوڭىلىنەن شىقپاق. وعان قىزمەت ەتەتىن «ءبىر بەلدەۋ، ءبىر جول»، «Made in China – 2025» دەگەن سەكىلدى تولىپ جاتقان باعدارلامالار بار. جالپى قاراعاندا، قىتاي 2020 جىلى ءوزىنىڭ شىنايى قالىبىن پاش ەتتى، ياعني كوممۋنيستىك رەجيم باتىستىق دەموكراتيامەن شىعىسا المايتىنىن انىق كورسەتتى.

قازىر، باتىس جۇرتى قىتايداعى اسقىنعان ۇلتشىلدىقتىڭ قاۋىپىنەن الاڭداپ وتىر. گولليۆۋد فيلمدەرى «امەريكا ارمانىن» ۋاعىزداپ كەلگەنى بەلگىلى، ەندى قىتايلىق ونەرپازدار «قىتاي ارمانىن»، قىتاي قوجا بولعان الەمدى ناسيحاتتايتىن شارالارى ۇكىمەتى مەن حالقى جاعىنان قولداۋ تابا باستادى. بۇل ءبىزدىڭ ىرگەمىزدەگى ويانعان قاۋىپتىڭ نىشانى سپەتتى.

“The Qazaq Times”