قىزىلوردا وبلىسىنىڭ ەكس-اكىمى مەن سىبايلاستارى سوتتالدى

قىزىلوردا وبلىسىنىڭ بۇرىنعى اكىمى قۋانىشبەك ىسقاقوۆ جەتى جىلعا باس بوستاندىعىنان ايىرىلدى. بۇل دەرەكتى 10 جەلتوقساندا اقپارات قۇرالدارى حابارلادى. كوكتەم ايلارىندا ىسقاقوۆتىڭ «الاياقتىق» بابى بويىنشا كۇدىككە ىلىنگەنى حابارلانعان ەدى.

اقپارات اگەنتتىكتەرىنىڭ جازۋىنشا، ونىڭ ەكى ورىنباسارى ارقايسىسى – 6 جىلعا، قىلمىستىق ءىس اياسىندا ايىپ تاعىلعان تاعى ەكى كاسىپكەردىڭ ارقايسىسى 5 جىلعا سوتتالعان. ولارعا تۇرمە جازاسى بەرىلگەن.

قىزىلوردا قالالىق №2 سوتىنىڭ سۋدياسى ابدۋللاجان سايدۋللاەۆتىڭ تۇسىندىرمەسىن اقپارات قۇرالى جاريالادى.

«باستى سوت تالقىلاۋىندا سوتتالۋشى ق.ىسقاقوۆتىڭ جاۋاپتى مەملەكەتتىك لاۋازىمدى اتقاراتىن ادام بولا تۇرا، ءوزىنىڭ قىزمەتتىك وكىلەتتىگىن قىزمەت بابىن پايدالانۋمەن ۇشتاستىرا وتىرىپ، ءبىر توپ اداممەن الدىن الا ءسوز بايلاسىپ، اسا ءىرى مولشەردە بوتەننىڭ مۇلكىن جىمقىرعانى انىقتالعان. ال، بۇرىنعى اكىمنىڭ ورىنباسارلارى سوتتالۋشىلار م.يماندوسوۆ جانە م.دەلمۇحانوۆ جاۋاپتى مەملەكەتتىك لاۋازىمدى اتقاراتىن ادام بولا تۇرا، ءوزىنىڭ قىزمەتتىك وكىلەتتىگىن قىزمەت بابىن پايدالانۋمەن ۇشتاستىرا وتىرىپ، سوتتالۋشىلار ج.ىسقاقوۆ جانە ا.دوسمايىلوۆتار سوتتالۋشى ق.ىسقاقوۆپەن ءبىر توپ ادام الدىن الا ءسوز بايلاسۋى ارقىلى بوتەننىڭ مۇلكىن جىمقىرۋعا، ونى جاساۋعا كەدەرگىلەردى جويۋعا كومەكتەسكەن»، – دەيدى سۋديا.

بيىل ناۋرىز ايىندا قۋانىشبەك ىسقاقوۆتىڭ «الاياقتىق» بابى بويىنشا كۇدىككە ءىلىنىپ، ۇيقاماققا قامالعان.

قۋانىشبەك ىسقاقوۆ 2019 جىلى ماۋسىم ايىندا قىزىلوردا وبلىسىنىڭ اكىمى لاۋازىمىنا تاعايىندالعان. وعان دەيىن ءۇش جارىم جىلدان استام سول كەزدەگى وبلىس اكىمى قىرىمبەك كوشەرباەۆتىڭ ورىنباسارى بولىپ، ەكونوميكا، قارجى، ەڭبەك جانە حالىقتى الەۋمەتتىك قورعاۋ سالاسىن باسقارعان.

28 ناۋرىزدا گۇلشارا ابدىحالىقوۆا پرەزيدەنت جارلىعىمەن قىزىلوردا وبلىسىنىڭ اكىمى بولىپ تاعايىندالعان.

"The Qazaq Times"