«ۆەرنىي كاپيتال» وتەمۇراتوۆتىڭ مۇلكى بۇعاتتان بوساتىلعانىن حابارلادى

بۇگىن 9 جەلتوقساندا «ۆەرنىي كاپيتال» كومپانيالار توبى بتا بانك بولات وتەمۇراتوۆتىڭ ۇستىنەن تۇسىرگەن شاعىمىن قايتىپ الۋعا كەلىستى دەپ حابارلادى. «وسى كەلىسىم بويىنشا اعىلشىن سوتىنىڭ وتەمۇراتوۆ اكتيۆتەرىن بۇعاتتاۋ تۋرالى بۇيرىعىنىڭ كۇشى جويىلدى» دەدى كومپانيا وكىلدەرى. كومپانيا حابارلاماسى Informburo سايتىندا جاريالاندى.

وتكەن اپتادا ۇلىبريتانيا سوتى بتا بانك شاعىمى نەگىزىندە وتەمۇراتوۆتىڭ اكتيۆتەرىن بۇعاتتاعان. اقپارات بويىنشا، «بتا» بيزنەسمەندى باسقالارمەن بىرگە بانكتەن ۇرلانعان اقشانى جاسىرۋعا كومەكتەستى دەپ ايىپتاعان.

وسى سارسەنبىدە جاريالانعان «ۆەرنىي كاپيتال» مالىمدەمەسىندە بولات وتەمۇراتوۆ پەن بتا بانك وكىلدەرى اراسىندا قۇپيا كەلىسىم جاسالعانى، بانكتىڭ سوتقا تۇسىرگەن شاعىمىن قايتارۋعا كەلىسكەنى جازىلعان. وندا جاۋاپكەر جاقتىڭ وتەمۇراتوۆ پەن ونىمەن بايلانىستى ادامداردىڭ «بانك اقشاسىن ۇرلاۋ ىسىنە قاتىسى جوقتىعىن دالەلدەيتىن» قۇجاتتاردى كورسەتۋگە ۋادە بەرگەنى جانە كەلىسىم جاسالعانعا دەيىن كەيبىر قۇجاتتاردىڭ بەرىلگەنى جازىلعان.

وسىعان دەيىن «ۆەرنىي كاپيتال» مالىمدەمە تاراتىپ، بۇعاتتاۋ تۋرالى سوت شەشىمى  «جالعان قۇجاتتار نەگىزىندە شىعارىلدى، سوت شەشىمىن اپەللياتسياعا بەردىك» دەپ حابارلاعان.

ازاتتىق راديوسىنىڭ حابارلاۋىنشا، «وتەمۇراتوۆ اكتيۆتەرىنىڭ بۇعاتتان بوساتىلعانى» جايلى اقپاراتتى «ۆەرنىي كاپيتالدان» باسقا ازىرگە ەشكىم تاراتقان جوق.

WSJ گازەتىنىڭ دەرەگىنە قاراعاندا، اعىلشىن ازاماتتىق سوتى 13 قاراشا كۇنى وتەمۇراتوۆقا تيەسىلى  بىرنەشە ەۋروپالىق قارجى بانكتەرىندەگى قاراجاتتى، جارتىلاي يەلىك ەتەتىن Ritz-Carlton قوناقۇيلەرىنىڭ ءۇش قالاداعى (ماسكەۋ، ۆەنا جانە قازاقستان استاناسى) كومپانيالارىن، سونداي-اق ۇلى ەكەۋى قوجالىق ەتەتىن Burger King فاستفۋد مەيرامحانالار جەلىسىنىڭ قازاقستاندىق فرانشيزاسىن بۇعاتتاۋعا شەشىم شىعارعان.

وتەمۇراتوۆ 2006-2008 جىلدارى سول كەزدەگى پرەزيدەنت نازارباەۆتىڭ ءىس باسقارۋشىسى قىزمەتىن اتقارعان، كەيىن ونىڭ شتاتتان تىس كەڭەسشىسى مىندەتىن اتقارعان. قازاقستاندىق Forbes-ءتىڭ بىلتىرعى رەيتينگىندە بولات وتەمۇراتوۆتىڭ جيعان-تەرگەنى مەن مۇلكى $2,07 ملرد كولەمىندە باعالانعان. امەريكالىق باسىلىمنىڭ مالىمەتىنشە، قازىر 62 جاستاعى وتەمۇراتوۆ 2,9 ميلليارد دوللار بايلىعىمەن الەمنىڭ ەڭ اۋقاتتى ادامدارىنىڭ قاتارىندا 764-ورىندا تۇر. دەگەنمەن بيزنەسمەننىڭ وكىلى ءابدىراحمانوۆا ونىڭ كاپيتالىنىڭ شىنايى قۇنى 3,2 ميلليارد دوللار ەكەنىن ايتتى دەپ جازادى WSJ. وليگارحتىڭ تاۋ-كەن مەتاللۋرگيا، مۇناي-گاز جانە تەلەكوممۋنيكاتسيا سالالارىنداعى، سونىمەن قوسا قارجىلىق قىزمەتتەر، جىلجىمايتىن مۇلىك، مەديا سەكتوردا اكتيۆتەرى بار.

"The Qazaq Times"