كورنەكى سۋرەت. فوتو: اشىق دەرەككوز

ءبىلىم ۆيتسە-ءمينيسترى بيبىگۇل اسىلوۆا رەداكتسيا جولداعان ساۋال بويىنشا، 2015 جىلدان بەرى سوت شەشىمىمەن 2,5 مىڭعا جۋىق جاس مەملەكەتتىك گرانتتىڭ اقىسىن وتەۋگە مىندەتتەلگەن.

«ءبىلىم تۋرالى» زاڭنىڭ 47-بابىنىڭ 17-تارماعىنا سايكەس، اۋىلدىق كۆوتامەن پەداگوگيكا ماماندىعىنا وقۋعا تۇسكەن جاستار جوو-نى بىتىرگەننەن كەيىن اۋىلدىق مەكتەپتەردە كەمىندە ءۇش جىل جۇمىس ىستەۋگە مىندەتەلگەن. وسى زاڭ اياسىندا مىندەتتى ورىنداماعان جاعدايدا بيۋدجەت قارجىسى سوت ارقىلى وندىرىلەدى. مۇنىمەن ءبىلىم مينيسترلىگىنىڭ وپەراتورى «قارجى ورتالىعى» اق اينالىسادى.

«2015 جىلدان باستاپ 2020 جىلدىڭ 26 قاراشا اراسىندا «قارجى ورتالىعى» اق جاس مامانداردىڭ زاڭ بۇزۋىنا بايلانىستى 5164 ارىزبەن سوتقا جىبەرىلگەن، ونىڭ ىشىندە 2433 جاس مامان سوت شەشىمى بويىنشا وقۋ شىعىندارىن مەملەكەتتىك بيۋدجەتكە قايتارىپ جاتىر. «قارجى ورتالىعى» اق جاس ماماندار جاۋاپكەرشىلىكتەن جالتارعان جاعدايدا ءبىلىم بەرۋ گرانتتارىنىڭ وتەلۋىن قامتاماسىز ەتۋ مىندەتى جۇكتەلگەن»، – دەلىنگەن ۆيتسە-مينيستر بيبىگۇل اسىلوۆانىڭ جاۋاپ حاتىندا.

دەگەنمەن قازاقستان جاستارىنىڭ اۋىلدىق جەرلەرگە بارماۋىنىڭ ءوز سەبەبى دە جوق ەمەس. وندا ءومىر ءسۇرۋ ساپاسى مەن جۇمىس ورنى زاماناۋي نورمالارعا ساي دەپ ايتۋعا كەلمەيدى. كاسىبي ءوسۋ جانە باسەكەلەستىكتىڭ جولى تار. جەتكىلىكتى جۇمىس ورىندارى جوق. سوندىقتان جاس مامانداردىڭ كوپشىلىگى قولىنا تيگەن جۇمىسقا تۇرىپ، تىرشىلىك ەتەدى. ال بيلىك بارلىق ايماقتاردا كەزدەسەتىن جۇمىسپەن قامتۋدىڭ جەتكىلىكسىزدىگىن بىلە تۇرا جاستاردى جاۋاپقا تارتۋدى مىندەتتەيدى. الەۋمەتتانۋشى ماماندار ءبىلىم گرانتى مەملەكەتتىك تاپسىرىس نەگىزىندە تاعايىندالعانتىقتان وڭىردە جۇمىسپەن قامتۋعا دا مەملەكەت جاۋاپتى بولۋى كەرەك دەيدى. راسىندا دا، وسىنداي سەبەپتەرمەن قالادا قىزمەت ەتىپ جۇرگەن جاستار «قارجى ورتالىعىنىڭ» شاعىمىمەن بورىشكەرلىك قامىتىن كيىپ ءجۇر.

"The Qazaq Times"