ەلباسىنىڭ تىكەلەي باستاماسىمەن ومىرگە كەلگەن «بولاشاق» حالىقارالىق باعدارلاماسى ارقىلى بۇگىندە مەن كارى قۇرلىقتان ءبىر ءۇزىم ەنشى الىپ، تۇماندى البيوندا ءبىلىمىمدى شىڭداۋدامىن. مەن تۇراتىن مانچەستەر قالاسىندا قازاق ستۋدەنتتەرى كوپ-اق. قولىم «قالت» ەتسە، ولاردىڭ ارقايسىسىمەن پىكىرلەسىپ تۇرۋعا تىرىسامىن. جاقسى اڭگىمەلەرىمدى وتانداستارىممەن بولىسسەم، ولارعا ۇلگى ەتسەم دەگەن ماقسات قوي  مەنىكى.

مانچەستەردەگى قازاقستاندىق ماگيسترانتتار مەن ستۋدەنتتەر

قىمبات قۇرىلعى اركىمگە قولجەتىمدى

ماحاببات تاتىباەۆا مانچەستەر ۋنيۆەرسيتەتىنىڭ حيميا فاكۋلتەتىن بيىل ءتامامدادى. ماماندىعىنا دەگەن ماحابباتى ءار سوزىنەن بايقالىپ تۇرادى ەكەن.

مانچەستەر ۋنيۆەرسيتەتىنىڭ حيميا فاكۋلتەتىنىڭ تۇلەگى ماحاببات تاتىباەۆا

– مانچەستەر ۋنيۆەرسيتەتى حيميا سالاسى بويىنشا الەمدە جەتىنشى ورىندا تۇر، وقۋ ورنىن تاڭداۋىما وسى دەرەك بىردەن-ءبىر سەبەپ بولعان، – دەپ جىلى جىميدى ول. – مانچەستەر ۋنيۆەرسيتەتىنىڭ كىرىسى جىلىنا 1 ميلليون فۋنتقا تەڭ. بۇل قاراجاتتى وقۋ ورداسى  عىلىمدى دامىتۋعا، كورپۋستار سالۋعا جانە زەرتحانالىق جۇمىسقا قاجەتتى سوڭعى ۇلگىدەگى قۇرال-جابدىقتار ساتىپ الۋعا جۇمسايدى. سوندىقتان، ۋنيۆەرسيتەتتىڭ عىلىمي  بازاسى مىقتى دامىعان. جانە ءبىر قۋانتاتىنى، زەرحانالاردا ءار ستۋدەنتكە تيەسىلى جەكە قۇرال-جابدىق بار. ءبىزدىڭ ەلدەگىدەي بەس-ون ادام توپ بولىپ ءبىر قۇرىلعىمەن جۇمىس ىستەمەيدى. ماسەلەن، مەن ماگيسترلىك جۇمىسىمدى جازۋ بارىسىندا باعاسى 3 ميلليون فۋنت تۇراتىن قۇرىلعىنى پايدالاندىم. بۇل قۇرىلعى لازەرىنىڭ قۋاتى سونداي كۇشتى، ءتىپتى، زاتتا قانشا مولەكۋلا بار ەكەندىگىن وپ-وڭاي انىقتاي الادى.

بىزگە موتيۆاتسيا بەرەتىن كەلەسى نارسە – ۇستازداردىڭ بىلىمدىلىگى. قايسىسىمەن تانىسساڭىز دا، ءبارى عىلىمدا ۇلكەن جەتىستىككە جەتكەن، ءوز سالاسىندا لايىقتى ورنى بار كىسىلەر. مەنىڭ عىلىمي جەتەكشىم دالتون يادرولىق ينستيتۋتىنىڭ ديرەكتورى ميليسسا دەنەكي دە بيىل يادرولىق ەنەرگەتيكا سالاسىنا قوسقان ۇلەسى ءۇشىن Becquerel Prize سىيلىعىنا يە بولدى. ول الەمدە مۇنداي سىيلىققا قول جەتكىزگەن العاشقى ايەل.

اعىلشىندار ينتەراكتيۆتىلىككە بەيىمدەلگەن. مىسالى، بۇگىنگى ساباقتا بولعان ءدارىستى ۋنيۆەرسيتەت سايتىنان وپ-وڭاي تاۋىپ الاسىز. وندا جاڭا تاقىرىپ تەك سلايد-پرەزەنتاتسيا تۇرىندە عانا ەمەس، ءاۋديودارىس تۇرىندە دە قولجەتىمدى. تۇسىنبەي قالساڭىز، كەز-كەلگەن ۋاقىتتا قايتا تىڭداۋعا بولادى.

تاعى ءبىر قۋناتىن جايت، مانچەستەر ۋنيۆەرسيتەتىندەگى ۇستازدارىم «ەكسپو 2017» حالىقارالىق كورمەسىنە قاتىسۋعا قىزىعۋشىلىق تانىتىپ وتىر. سوڭعى كەزدەسۋىمىزدە ولار ماعان ۋنيۆەرسيتەتتىڭ كورمەدەگى وكىلى بولۋدى ۇسىندى. ارينە، مەن بۇعان كەلىسىم بەردىم. ولار وسى وقۋ ورنىن بىتىرگەن قازاقستاندىق ستۋدەنتتەردى وسى شارادا بىرىگىپ جۇمىس ىستەۋگە شاقىردى. ەڭبەكتەرى ءۇشىن اقىسى تولەنەتىنىن دە ايتتى.

 

فۋتبولمەن «ۇيىقتاپ-وياناتىن» مانچەستەر

مانچەستەر دەگەندە ويىمىزعا ەڭ الدىمەن فۋتبول تۇسەتىنى بەلگىلى. ءيا، مۇنداعى حالىق شىنىمەن دە فۋتبولمەن «ۇيىقتاپ-ويانادى». دوپتى دارىپتەيتىن تۇرعىنداردىڭ ستاديون ماڭىنداعى سالتتارىن «بولاشاقتىق» ستۋدەنت ارعىن توكەەۆتەن سۇراعان ەدىك. مانچەستەر ۋنيۆەرسيتەتىندەگى development economics and policy فاكۋلتەتىنىڭ ماگيسترانتى ءبىراز جايتتاردى بايانداپ بەردى:

مانچەستەر ۋنيۆەرسيتەتىندەگى development economics and policy فاكۋلتەتىنىڭ ماگيسترانتى ارعىن توكەەۆ

– مانچەستەرلىكتەر ءۇشىن فۋتبول – قوس كوماندانىڭ جاي عانا ويىنى ەمەس، وزىنشە بولەك عۇرىپ. ويتكەنى، «مانچەستەر يۋنايتەد» جانە «مانچەستەر سيتي» اتتى ەكى الپاۋىت كلۋب وسىندا ورنالاسقان. بۇل ەكەۋدىڭ اراسىنداعى ماتچ – قالالىقتاردىڭ ءجيى تالقىلايتىن تاقىرىبى. فۋتبول بولاتىن كۇندەرى قاي جەرگە بارساڭىز دا، دۋىلداعان جانكۇيەرلەردى كورەسىز. ولاردىڭ حاريزماسى مىقتى. ناعىز جانكۇيەرلىكتى سولاردان ۇيرەنۋگە ابدەن بولادى.

ءوزىم بۇرىننان يسپانيالىق «رەال مادريد» كلۋبىنىڭ جانكۇيەرىمىن. «مانچەستەر سيتي» مەن «رەال ءمادريدتىڭ» 2015-2016 جىلعى چەمپيوندار ليگاسىنىڭ جارتىلاي فينالىندا كەزدەسۋى مەن ءۇشىن ەشقاشان ۇمىتىلماس عاجاپ ساتتەردىڭ ءبىرى بولدى. جۇرتتىڭ تەلەديداردان تەلمىرىپ كورىپ وتىرعان ماتچىن مەن ءوز كوزىممەن، ستاديون اتموسفەراسىن سەزىنىپ تاماشالاعانىمدا باقىتتى كۇي كەشتىم. مانچەستەر سىيلاعان باقىت بۇل.

ارينە، ەلىمىزدەگى فۋتبولدىڭ جاي-كۇيىن انگليانىكىمەن سالىستىرۋ مۇمكىن ەمەس. ويتكەنى، اعىلشىن اياقدوبى قانشاما عاسىرلار بويى قالىپتاستى. دەگەنمەن، بىزدە دە وتاندىق فۋتبول ءيميدجىن جاقسارتۋعا ۇلەس قوسىپ جۇرگەن تالانتتى ويىنشىلار بار جانە ولار جاقسى جاتتىعۋ ۇستىندە. مەنىڭ ويىمشا، ءبىز ويىننىڭ ستراتەگيالىق ءتاسىلىن، كونتسەپتسياسىن انگليا سەكىلدى مىقتى دەرجاۆادان ۇيرەنۋىمىز كەرەك. سونداي-اق، جانكۇيەرلەرگە دە كوپ نارسە بايلانىستى.

 

«قازاقتار كيىز ۇيدە تۇرا ما؟»

اعىلشىندار قازاقتاردى تاني ما ەكەن دەگەن سۇراق كوكەيىڭىزدە جۇرسە، وعان دا جاۋاپ دايىن. مانچەستەر ۋنيۆەرسيتەتىنىڭ ماگيسترانتى ازامات جانسەيىتوۆتىڭ ايتۋىنشا، العاشىندا كەيبىرەۋلەرى قازاقستاندى ءالى دە كوشپەندى تۇرمىس كەشەتىن مەملەكەت رەتىندە ەلەستەتىپتى.

مانچەستەر ۋنيۆەرسيتەتىنىڭ ماگيسترانتى ازامات جانسەيىتوۆ

– «سىزدەر كيىز ۇيدە تۇرمايسىزدار ما؟» دەپ تاڭدانا سۇراعاندار دا بولدى. سانالارىنا ءسىڭىپ قالعان سونداي ستەرەوتيپتەردى سىزىپ تاستادىق. ءبىزدىڭ ءبىلىمىمىزدى، مادەنيەتىمىزدى، ادەت-عۇرپىمىزدى، نەبىر تاماشا سالت-داستۇرلەرىمىزدى تانىعان سايىن ولاردىڭ بىزگە دەگەن قۇرمەتتەرى ارتا تۇسۋدە. بۇگىندە كوپشىلىگى ءبىزدىڭ تۋدى بىلەدى، گەننادي گولوۆكيندى تانيدى. قازاق ستۋدەنتتەرىنىڭ ءبىرازى ۇلتتىق ويۋى بار كيىمدەر كيەتىندىكتەن، ناقىشىمىزعا دا زەر سالا باستادى. قازاقستاندىق يميدج دەگەننىڭ ءبارى وسىدان شىعادى عوي.

جاقىندا تاۋەلسىزدىكتىڭ 25 جىلدىعىنا وراي ارنايى بەينەروليك تۇسىردىك. ستۋدەنتتەر بۇل شاراعا بەلسەنە اتسالىستى. العاشىندا ۋنيۆەرسيتەت كولەمىندە اتاپ وتسەك دەگەن وي بولعان. الايدا، قازىر ەمتيحان ۋاقىتى، سوندىقتان ستۋدەنتتەردىڭ كولەمدى شارا ۇيىمداستىرۋلارىنا ۋاقىتى جوق. سول سەبەپتى، وتانىمىزدى وسى ءبىر ايتۋلى مەرەمەن قۇتتىقتاپ، بەينەروليك جولدادىق. بەينەروليك جاساۋ بارىسىندا ءبىز وسى جىلدار ارالىعىندا قول جەتكىزگەن جەتىستىكتەردى تىزگەننەن گورى، كەلەشەكتە ونىڭ دامۋىنا قانداي ۇلەس قوسا الاتىنىمىزدى جەتكىزگىمىز كەلدى.

ۇلىبريتانيادا جىل سايىن «دوستىق Cup» اتتى اۋقىمدى شارا وتكىزىلىپ تۇرادى. بيىل ول مانچەستەردە بولادى. سونىڭ اياسىندا انگليادا، شوتلانديادا، ۋەلستە جانە سولتۇستىك يرلانديادا وقىپ جاتقان قازاق ستۋدەنتتەرى باس قوسپاق.

“The Qazaq Times”