قاراشادا ۇلىبريتانيا مەن ەۋروپالىق وداق Brexit كەلىسىمىنە قول قويماق.

فرانتسيادا وتكەن ءباسپاسوز كونفەرەنتسياسىندا يرلانديانىڭ سىرتقى ىستەر ءمينيسترى سايمون كوۆني ەو-دان شىعۋ تۋرالى كەلىسىمدى قۇپتايتىنىن ايتتى. كۇنى بۇگىنگە دەيىن قوس تاراپ بريتانيا پرەمەر-ءمينيسترى تەرەزا مەيدىڭ Brexit تۋرالى جوسپارىنا سەنىم بىلدىرگەن جوق. بىرقاتار ساراپشىلار «بىرىككەن كورولدىك ەۋرووداقتان شىعاتىن بولسا ءسوزسىز ۇتىلادى» دەپ ەسەپتەدى. سەبەبى، يرلانديا مەن سولتۇستىك يرلانديا شەكاراسىنداعى ماسەلە مەن الداعى ۋاقىتتا بريتانيانىڭ ەۋروپا ەلدەرىمەن ءوزارا قارىم-قاتىناسىن شەشۋ ماسەلەسى ءالى دە تالقىلانىپ كەلەدى. وسىعان بايلانىستى يرلانديانىڭ سىرتقى ىستەر ءمينيسترى سايمون كوۆني: «بريتانيانىڭ مينيسترلەرىمەن كەزدەسىپ، ءبىراز ماسەلەلەردى تالقىلادىق. ءبىزدىڭ تاراپتىڭ ويىنشا، بىرىككەن كورولدىكتىڭ وداق قۇرامىنان شىعۋ كەلىسىمى وسى ايدا بەكىتىلگەنى دۇرىس بولادى»، – دەدى.
ايتا كەتەيىك، كەلىسسوزدەر 2017 جىلدان بەرى جالعاسىپ كەلەدى. تاياۋدا مەي ۇكىمەتى Brexit كەلىسىمىنىڭ تولىققاندى دايىن ەكەندىگىن ايتقان. ەندى ۇلىبريتانيانىڭ Brexit جوسپارى كەلەر جىلدىڭ ناۋرىز ايىندا جۇزەگە اسپاق.

"The Qazaq Times"