توقاەۆ قازاقستان-بەلارۋس كەلىسىمىنە قاتىستى زاڭعا قول قويدى

قاسىم-جومارت توقاەۆ «قازاقستان مەن بەلارۋس اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭعا قول قويدى.

بۇعان دەيىن ىشكى ىستەر ءمينيسترى ەرلان تۇرعىمباەۆ اتالعان كەلىسىمنىڭ قوس ازاماتتىقتىڭ الدىن الۋعا باعىتتالعانىن ايتقان. تۇرعىمباەۆ: «بۇل ۋاكىلەتتى ورگاندارمەن كەلىسىلدى. ەكى تاراپ ازاماتتىق تۋرالى اقپارات الماسادى. سونىمەن قاتار، شەكارادا «بۇركىت» اقپاراتتىق بازاسى بار جانە وسى جۇيە ارقىلى بىزگە قانشا ادام كەلىپ، قانشا ادام باراتىنىنان حاباردار بولىپ وتىرامىز»، – دەدى.

تۇتاستاي العاندا، زاڭ ەكى ەلگە ستاتيستيكالىق، قۇقىقتىق جانە عىلىمي-ادىستەمەلىك اقپاراتپەن; ولاردىڭ اۋماعىنداعى ەكى مەملەكەتتىڭ ازاماتتارى تۋرالى مالىمەتتەرمەن، سونداي-اق زاڭسىز كوشى-قون تۋرالى مالىمەتتەرمەن الماسۋعا مۇمكىندىك بەرەدى.

قازىر بەلاۋرستە بيلىك ساياساتىنا قارسى «دەموكراتيا جولىنداعى كۇرەس» ۇرانىمەن ميتينگىلەردىڭ ءوتىپ جاتقانىنا 4 ايدان استى. وپپوزيتسيا حالىقتىق ۋلتيماتۋم جاريالاعانمەن، لۋكاشەنكو بيلىگى نارازىلارعا قارسى كۇش قولدانۋىن توقتاتقان جوق.

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالاعان. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. ازاماتتىق بەلسەندىلەر سايلاۋ قورىتىندىسى بۇرمالاندى دەپ سانايدى. سايلاۋدان كەيىن لۋكاشەنكونى «ايقىن جەڭىسىمەن» العاشقى بوپ قۇتتىقتاعان مەملەكەتتەر قاتارىندا قازاقستان بار.

"The Qazaq Times"