قىرعىزستان: سادىر جاپاروۆ بارلىق قىزمەتىن توقاتتى

سادىر جاپاروۆ ءوزىنىڭ قىرعىزستان پرەزيدەنتىنىڭ مىندەتىن اتقارۋىن توقتاتقانىن مالىمدەدى. پرەمەر-مينيستر جاپاروۆ پرەزيدەنتتىك سايلاۋعا كانديداتتىعىن ۇسىنىپ، سايلاۋعا دايىندالاتىنىن ءبىلدىردى. ب تۇستەن بۇرىن وتكەن ءباسپاسوز جيىنىندا جاپاروۆ پرەمەر-مينيستر قىزمەتىن دە توقتاتقانىن مالىمدەدى.

قىرعىز كونستيتۋتسياسىنا سايكەس پرەزيدەنت مىندەتىن ۋاقىتشا اتقارىپ تۇرعان تۇلعا، پرەزيدەنتتىك سايلاۋعا قاتىسا المايدى. جاپاروۆنىڭ پرەزيدەنتتىك ۋاقىتشا مىندەتىن اتقارۋشى وكىلەتتىلىگى اۆتوماتتى تۇردە جوعارى كەڭەستىڭ توراعاسى، بۇل مانساپقا جاقىندا عانا وتىرعان جاپاروۆتىڭ جاقىن دوسى تالانت مامىتوۆقا ءوتتى. ال، پرەمەر-مينيستر بولىپ بۇعان دەيىن جاپاروۆتىڭ ورىنباسارى بولىپ كەلگەن ارتەم نوۆيكوۆ تاعايىندالدى.

پرەزيدەنتتىككە تالاپكەرلەردى انىقتاۋعا ەكى كۇن قالدى. قىرعىزستان ورتالىق سايلاۋ كوميسسياسىنىڭ مالىمەتىنە قاراعاندا تالاپكەر ءوز ءوتىنىشىن اكەلىپ تاپسىرعاننان باستاپ پرەزيدەنتتىككە تالاپكەر قاتارىندا سانالادى. قازىرشە، پرەزيدەنتتىكە ءوز كانديتاتتىعىن ۇسىنعاندار سانى 16, ونىڭ اراسىندا ەلدەگى ىقپالدى ساياساتكەر، «ءبۇتۇن قىرعىزستان» پارتياسىنىڭ ليدەرى اداحان كەمسانبايۇلى مادۋماروۆ تا بار. ال، پرەزيدەنت سايلاۋ 10 قاڭتاردا وتەدى دەپ بەلگىلەنگەن.

قىرعىزستاندا سادىر جاپاروۆتى قولداۋشىلارمەن قاتار ونى بيلىكتى باسىپ الدى جانە كونستيتۋتسيالىق جولعا سالۋدىڭ ورنىنا كونستيتۋتسيا شەڭبەرىنەن شىعىپ، بيلىككە ءوز ادامدارىن توپتاستىردى دەپ سانايتىندار دا بار. قىرعىز اتا زاڭىنا سايكەس بۇل ۋاجدەر نەگىزسسىز ەمەس. ايتالىق، پرەزيدەنت مىندەتىن اتقارىپ تۇرعان كەزىندە ول كونستيتۋتسيالىق رەفورمالاردى باستادى، ال كونستيتۋتسيا پرەزيدەنت مىندەتىن اتقارۋشى تۇلعاعا ونداي مۇمكىندىك بەرمەيدى.

قىرعىزستان پرەزيدەنتىنىڭ مىندەتىن اتقارۋشى، پرەمەر-مينيستر سادىر جاپاروۆتىڭ باق وكىلدەرىمەن وتكىزگەن جيىنى ءبىر جارىم ساعاتقا سوزىلدى. قىرعىزستانداعى وتاندىق جانە شەتەلدىك 86 اقپارات قۇرالى قاتىستى.

“The Qazaq Times”