فوتو: https://atpress.kz

الەمدە ءبىر اپتا ىشىندە كوروناۆيرۋس جۇقتىرۋ بويىنشا تاعى دا انتيرەكورد ورنادى. بۇل تۋرالى دۇنيەجۇزىلىك دەنساۋلىق ساقتاۋ ۇيىمى حابارلادى.

سوڭعى جەتى كۇندە دۇنيە جۇزىندە 3 ميلليون 600 مىڭعا جۋىق ادامنان ۆيرۋس انىقتالعان. ولاردىڭ دەنى – ەۋروپالىقتار . ءولىم-ءجىتىم كورسەتكىشىنىڭ جارتىسىنا جۋىعى دا ەۋروپادا تىركەلگەن.

رەسمي مالىمەتتەر بويىنشا، دۇنيەجۇزى بويىنشا كوروناۆيرۋس جۇقتىرعاندار سانى 52 ميلليوننان اسقان. پاندەميانىڭ ەكىنشى تولقىنى بەلەڭ العان ەۋروپانىڭ بىرقاتار مەملەكەتتەرى ەكىنشى رەت جاوپى وقشاۋلاۋ رەجيمىنە كوشتى.

قاتاڭ شەكتەۋلەر ەنگىزگەن ۇلىبريتانيادا دا ىندەتتىڭ تارالۋىن باقىلاۋعا الۋ ءۇشىن تۇرعىنداردى تەستىلەۋ كۇشەيتىلدى. بيلىك ازاماتتارعا اۋرۋدىڭ نىشاندارى بايقالماسا دا، تەكسەرىستەن وتۋگە كەڭەس بەرۋدە. ۇكىمەت وسى ارقىلى ۆيرۋستى جۇقتىرعانداردى تەز انىقتاپ، ىندەتتىڭ تارالۋىن ازايتۋدى كوزدەپ وتىر.

يتاليادا ىندەتتىڭ تارالۋى قايتا كۇشەيىپ، دەرتكە شالدىققاندار 1 ميلليوننان استى. اپپەنين تۇبەگىندە كۇن سايىن 30 مىڭنان استام ادامنان انىقتالىپ جاتىر. ماماندار ىندەتتىڭ كۇشەيۋىن ەلدە جاپپاي تەستىلەۋ جۇرگىزىلە باستاۋىمەن بايلانىستىردى. ال وقشاۋلاۋ ءتارتىبى ەنگىزىلگەن فرانتسيا اۋرۋحانالارىندا كوروناۆيرۋستى جۇقتىرعاندار سانى ارتىپ، ەمدەۋ ورتالىقتارىندا ورىن جەتىسپەي جاتىر. سالدارىنان ناۋقاستاردى كورشى گەرمانياعا اتتاندىرىپ جاتىر. ولاردىڭ باسىم بولىگى – قارتتار.

ايتا كەتەيىك، كەشە Pfizer جانە BioNTech فارماتسەۆتيكالىق كومپانياسى جاساعان ۆاكتسينا بارلىق سىناقتان ءساتتى ءوتىپ، 90% دالدىك كورسەتكەن. ەكى كومپانيا وسىعان دەيىن ۆاكتسينانىڭ ادامعا تەرىس اسەرى بولماعانىن مالىمدەدى. قازىر Pfizer مەن BioNTech اقش بيلىگىنەن وسى ايدا ۆاكتسينانى توتەنشە جاعدايدا قولدانۋعا رۇقسات الماق. ساراپشىلار بۇل جاڭالىقتى «ادامزات ۇلى كۇن» دەپ باعالادى.

"The Qazaq Times"