دۋلات اعادىلدىڭ ۇلى جانبولات كىسى قولىنان قازا تاپتى

ازاماتتىق بەلسەندى، مارقۇم دۋلات اعادىلدىڭ ۇلى جانبولات اعادىل توبەلەس كەزىندە قازا تاپتى. بۇل تۋرالى استانانىڭ قالالىق پوليتسيا دەپارتامەنتى ءباسپاسوز قىزمەتى مالىمدەدى. پىشاق جاراقاتىنان مەرت بولعان جانبولات كامەلەت جاسىنا دا تولماعان بولاتىن.

رەسميلەردىڭ مالىمەتىندە جانبولات اعادىلدىڭ ولىمىنە سەبەپ بولعان توبەلەستىڭ نەدەن شىققانى تۋرالى انىق دەرەك جوق. تەك «جاستار اراسىنداعى كەلىسپەۋشىلىك» توبەلەسكە مۇرىندىق بولدى دەگەن مالىمەت بار. سونداي-اق، توبەلەستە جانبولاتتان وزگە 2 ادامنىڭ جاراقات العانى دا حابارلاندى.

رەسمي مالىمدەمەلەرگە قاراعاندا، وقيعا 11 قاراشاعا قاراعان تۇندە، 23:00 شاماسىندا بولعان. پوليتسيا تارابى قىلمىستىق ءىس قوزعاپ، تەرگەۋ جۇمىستارىن جۇرگىزىپ جاتقانىن ايتادى. الدىن الا بەرىلگەن مالىمەت بويىنشا وقيعاعا قاتىستى دەلىنگەن ءبىر ادام ۇستالعان.

جانبولات اعادىلدىڭ ولىمىنە بايلانىستى قازىر الەۋمەتتىك جەلىلەردە كۇشتى تالقى ءجۇرىپ جاتىر. كەيبىر جەلى قولدانۋشىلار جانبولاتتىڭ ءولىمى جاي عانا توبەلەستەن بولدى دەگەنگە سەنگىسى كەلمەيتىنىن جازۋدا.

جانبولاتتىڭ اكەسى، قوعام بەلسەندىسى دۋلات اعادىل اقپان ايىندا استانانىڭ تەرگەۋ اباقتىسىندا قازا تاپقانى بەلگىلى، ەلوردانىڭ پوليتسيا دەپارتامەنتى ونى جۇرەك تالماسىنان قازا بولدى دەگەن. مارقۇمنىڭ جاقىندارى بۇعان كەلىسپەدى جانە قوعامدا كۇشتى رەاكتسيا تانىتقان. الايدا، دۋلات اعادىلدىڭ ءولىمى تۋرالى پرەزيدەنت تە جۇرەك تالماسىنان قازا بولدى دەگەن مالىمدەمە جاساعان بولاتىن.

“The Qazaq Times”