بەلارۋس بيلىگى نارازىلاردى كۇشپەن ۇستاۋىن جالعاستىرۋدا

بەلارۋس بيلىگىنىڭ ساياساتىنا قارسى نارازىلىق شەرۋلەرى ءۇش ايدان بەرى جالعاسىپ كەلەدى. جەكسەنبىدە مينسك ورتالىعىندا وتكەن سانكتسيالانباعان «دەموكراتيا شەرۋى» كەزىندە پوليتسيا بەلسەندىلەردى كۇشپەن ۇستادى.

تut.by سايتىنىڭ حابارلاۋىنشا، مينسكىنىڭ ءار اۋداندارىندا وتكەن شەرۋدە 1000-نان استام ادام ۇستالعان.

7 قاراشادا ەلدە مەديتسينا قىزمەتكەرلەرىنىڭ لۋكاشەنكوعا قارسى نارازىلىق جيىنى وتكەن. پوليتسيا ونداعان مەديتسينا قىزمەتكەرىن قاماۋعا الدى. رەسميمالىمەتتەر بويىنشا،  60-قا جۋىق دارىگەر مەن دەنساۋلىق سالاسىنىڭ باسقا قىزمەتكەرى قامالىپ، پوليتسيا بولىمشەلەرىنە جەتكىزىلگەن.

سايلاۋدان سوڭ وزىنە جانە وتباسىنا قاۋىپ تونگەندىكتەن، ليتۆاعا كەتىپ قالعان وپپوزيتسيا جەتەكشىسى سۆەتلانا تيحانوۆسكايا نارازىلىعىن ءبىلدىرىپ، باتىلدىق تانىتقان مەديتسينا قىزمەتكەرلەرىنە العىس ءبىلدىردى جانە پاندەميا تۇسىندا دەنساۋلىق سالاسى ماماندارىنا قىسىم جاساپ جاتقان بيلىكتى سىنعا الدى.

وتكەن اپتادا ەقىۇ قۇرامىنداعى مەملەكەتتەر الەكساندر لۋكاشەنكودان ءادىل سايلاۋ وتكىزۋدى تالاپ ەتىپ، ارنايى ەسەپ جاريالاعان. ەقىۇ-نىڭ باياندامالارىندا بەلارۋس بيلىگى «ادام قۇقىقتارىن تاپتاپ، ءسوز بوستاندىعىن شەكتەدى» دەلىنگەن. ۇيىمنىڭ ەسەبى 17 مەملەكەتتىڭ ءوتىنىشى بويىنشا ازىرلەنگەن. قۇجاتتا 700 شاقتى دالەل، ايعاق كەلتىرىلەدى. وسىعان دەيىن مينسك قۇجاتتى ازىرلەۋگە اتسالىسۋدان باس تارتقان.

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالادى. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. ازاماتتىق بەلسەندىلەر سايلاۋ قورىتىندىسى بۇرمالاندى دەپ سانايدى. لۋكاشەنكونىڭ وتستاۆكاسىن تالاپ ەتكەن نارازىلىق شارالارى ەلدىڭ ءتۇرلى قالالارىندا جالعاسىپ جاتىر.

"The Qazaq Times"