پاندەميانىڭ ەكىنشى تولقىنى: فرانتسيادا لوكداۋن جاريالاندى

فرانتسيادا ءبىر كۇندە 30 مىڭنان استام ۆيرۋس دەرەگى تىركەلىپ، مەملەكەت قايتادان تۇتاس وقشاۋلاۋ رەجيمىنە كوشتى. ەگەر ۆيرۋس كورسەتكىشى 5 مىڭعا دەيىن ازايسا عانا قاتاڭ شەكتەۋ شارالارىن جەڭىلدەتۋگە بولادى. بۇل تۋرالى پرەزيدەنت ەممانۋەل ماكرون حالىققا جولداعان تەلەۇندەۋىندە حابارلادى.

ەلدىڭ بارلىق اۋماعى بويىنشا ەنگىزىلگەن قاتاڭ شەكتەۋ شارالارى ەرتەڭنەن باستاپ 1 جەلتوقسانعا دەيىن جالعاسادى. ەندى تۇرعىندار تەك جۇگىرۋگە، جۇمىس پەن مەكتەپكە، دۇكەن مەن اۋرۋحاناعا نەمەسە مەملەكەتتىك ۇيىمدارعا عانا بارۋ ءۇشىن سىرتقا شىعا الادى. ونىڭ وزىندە ارنايى رۇقسات قاعازى بولۋى ءتيىس.

حالىققا ۇندەۋىندە پرەزيدەنت ەممانۋەل ماكرون: «ەۋروپانىڭ وزگە ەلدەرىندەگى جاعداي بىزدە دە تۋىندادى. فرانتسيادا قاۋىپتى ۆيرۋس تەز تاراي باستادى. كۇن سۋىعان سوڭ دا كوروناۆيرۋس ۇدەپ كەلە جاتقان بولار. جاعدايدىڭ ۋشىعا تۇسكەنىنە ءبارىمىز دە الاڭداپ وتىرمىز. كەي ەلدەر بىزدەن دە قاتاڭ شارالاردى قابىلداعان ەكەن. ىندەتتىڭ ەكىنشى تولقىنى بىرىنشىسىنەن دە قيىن بولۋى ىقتيمال دەگەن دە بولجام بار»، – دەيدى.

جاڭا تالاپتارعا سايكەس كافە، مەيرامحانا، مادەني جانە ويىن-ساۋىق مەكەمەلەر ۋاقىتشا جابىلادى. دەگەنمەن، بالاباقشالار مەن مەكتەپتەر جۇمىسىن جالعاستىرا بەرەدى. ستۋدەنتتەر بولسا، ساباعىن ونلاين فورماتتا وقىماق.

16 قازاننان باستاپ ەلدە 4 اپتاعا توتەنشە جاعداي ەنگىزىلىپ، كارانتين شارالارى كۇشەيتىلدى. بيلىك ونى قاراشانىڭ سوڭىنا دەيىن سوزۋدى كوزدەپ وتىر. تارتىپكە باعىنباعاندار ءبىرىنشى رەت ەرەجە بۇزسا 135 ەۋرو كولەمىندە، ال ەكىنشى قايتارا تىركەلسە 6 500 ەۋرو ايىپپۇل تولەيدى. مۇنىمەن قوسا، كينوتەاتر، تەاتر، كافە-بارلاردىڭ جۇمىس ۋاقىتىنا شەكتەۋ ەنگىزىلگەن. الداعى بىرنەشە ايدا پاريج بەن تاعى 8 ءىرى قالادا مەرەكەلىك كەشتەر ۇيىمداستىرۋعا تىيىم سالىنعان. سونىمەن قاتار مەملەكەتتىك جانە جەكەمەنشىك كومپانيا قىزمەتكەرلەرى قاشىقتان جۇمىس ىستەۋگە كوشىرىلدى.

"The Qazaq Times"