كاراچيگە بارار جول ۇستىندە لاڭكەستىك شابۋىل بولدى. فوتو: Dawn.

پاكىستاننىڭ بەلۋجيستان جەرىندە لاڭكەستىك شابۋىل بولدى. يسلامابادتىڭ كەشە تاراتقان مالىمەتىندە كەمىندە 14 قاۋىپسىزدىك قىزمەتكەرى وققا ۇشقانى ايتىلعان.

پاكىستان اسكەريلەرىنىڭ تاراتقان مالىمەتىنە قاراعاندا،  گۆاداردان كاراچيگە مۇناي-گاز دەپارتامەنتىنىڭ قىزمەتكەرلەرىن الىپ بارا جاتقان كولوننا ەكى قالانى جالعاعان جول ۇستىندە قارۋلى لاڭكەستەردىڭ شابۋىلىنا تاپ بولعان. ولاردى قورعاپ بارا جاتقان قارۋلى جاساقتار مەن لاڭكەستەر اراسىندا سۇراپىل اتىس بولعان. مالىمدەمەدە، قاۋىپسىزدىك كۇشتەرى لاڭكەستەرگە ءونىمدى سوققى بەرىپ، دەپارتامەنت قىزمەتكەرلەرىن قورعاپ قالعانى ايتىلادى.

پاكىستان پرەمەر-ءمينيسترى يمران حان ادام شىعىنىنا الىپ كەلگەن لاڭكەستىك شابۋىل تۋرالى رەسمي مالىمدەمە جاسادى جانە  جەدەل تەرگەۋ جۇرگىزۋدى بۇيىردى.

بەلۋجيستان سەپاراتيستىك كۇشتەرى شابۋىلدى ءوز مويىندارىنا الىپ مالىمدەمە تاراتتى. اۆتونوميالىق ستاتۋسقا يە بەلۋجيستاندا سەپاراتيستىك كۇشتەر كوپ جىلدان بەرى يسلاماباد بيلىگىنە قارسى ارەكەت ەتىپ كەلەدى. دەگەنمەن جەرگىلىكتى اسكەري شەندىلەردىڭ مالىمەتىنشە، سوڭعى جىلدارداعى قارۋلى سوققىلاردان كەيىن سەپاراتيستىك توپ بارىنشا السىرەگەن.

“The Qazaq Times”