كۇزگى تولقىن قارساڭىندا قازاقستانداعى احۋال قيىنداي ءتۇستى. كورنەكى سۋرەت. فوتو: focus.ua

رەسمي دەرەك بويىنشا، قازاقستاندا 15 قازان كۇنى 108 ادامنان كوروناۆيرۋس، 166 ادامنان كوروناۆيرۋس پنەۆمونياسى انىقتالدى. قازان ايىنىڭ ءبىرىنشى جارتىسىندا كوروناۆيرۋستان اۋىرعان بالالار مەن ستاتسيوناردا ەمدەلىپ جاتقانداردىڭ قاتارى كوبەيگەن. امبۋلاتوريالىق باقىلاۋداعى ناۋقاستار ايتارلىقتاي كەمىگەن. 

#كوروناۆيرۋس  15 قازان كۇنى كورونۆيرۋس جۇقتىرعان 276 ادام ايىعىپ شىقسا، 3 ادام ومىردەن وتكەن. ال جاڭادان تىركەلگەن ناۋقاستاردىڭ ەڭ كوبى – استانادان (16) جانە سقو (14), پاۆلودار (12), شقو (10) وبلىستارىنان، الماتى قالاسىنان (12). ال قىزىلوردا وبلىسى مەن شىمكەنت قالاسىندا بىردە-ءبىر ناۋقاس انىقتالماعان.

دەنمين-ءنىڭ رەسمي مالىمەتىنشە, ەمدەلىپ جاتقان 2618 ادامنىڭ 2042-ءcى اۋرۋحانادا. ال قالعان 576 ناۋقاس امبۋلاتورلىق تەراپيادا. ولاردىڭ اراسىندا 107 بالا بار.

احۋالى ناشار 81 ناۋقاستىڭ اراسىندا 14 ادامنىڭ جاعدايى قاتتى قيىنداعان. جانە 12 ناۋقاس وكپەنى جاساندى جەلدەتۋ اپپاراتىمەن تىنىستاپ جاتىر. كەيىنگى كەزدە امبۋلاتورلىق باقىلاۋدا بولاتىن پاتسيەنتتەردىڭ سانى كەمىپ، كەرىسىنشە ساتتسيوناردا ەمدەلۋشىلەر قاتارى ارتقان.

رەسپۋبليكا بويىنشا بارلىعى 109 202 ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 104 801 ادام. بۇل جالپى ناۋقاستاردىڭ 95%-دان استامى. وتكەن اپتانىڭ سارسەنبىسىنەن بەرى قازاقستاندا كوروناۆيرۋس كوبەيگەن ەدى.

#كوروناۆيرۋس_پنەۆمونياسى سونىمەن قوسا، بەيسەنبى كۇنى كوروناۆيرۋس پنەۆمونياسىنا شالدىققان 166 ادام، 2 ءولىم جاعدايى تىركەلگەن. تاعى 82 ادام ايىعىپ شىققان. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. پنەۆمونياعا شالدىققان 35,5 مىڭ ادامنىڭ 28 مىڭنان ءسال استامى جازىلىپ شىققان.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. رەسمي دەرەككە سايكەس، قازان ايىنىڭ العاشقى جارتىسىندا  كوروناۆيرۋس جۇقتىرعان 1223 ادام انىقتالىپ، 49 ادام قايتىس بولعان. ءدال وسى ۋاقىتتا كوروناۆيرۋس پنەۆمونياسىنا 2581 ادامنىڭ شالدىعىپ، 21 ادام قايتقان. پنەۆمونيادان اۋىرعانداردىڭ سانى كوروناۆيرۋسقا قارعاندا ەكى ەسە كوپ بولعانىمەن، – قايتىس بولعاندار پتر ارقىلى راستالعان كوۆيدتەن 2,3 ەسە از.

وتكەن تامىز جانە قىركۇيەك ايلارىندا قازاقستاندا كوروناۆيرۋس جۇقتىرعاندار 17 مىڭنان، ال كوروناۆيرۋس پنەۆمونياسىنا شالدىققاندار 34 مىڭنان اسقان. ەكەۋىن قوسا ەسەپتەگەندە، كەيىنگى ەكى ايدا ىندەتتەن 600-دەي قازاقستاندىق ومىردەن وتكەن. سونىمەن بىرگە، وسى ارالىقتا (تامىز-قىركۇيەك) جرۆي اۋرۋلارىمەن 418 مىڭنان، پنەۆمونيانىڭ باسقا تۇرلەرىمەن 82 مىڭنان استام جاعداي تىركەلگەن.

7 قازان دەنساۋلىق ساقتاۋ ءمينيسترى الەكسەي تسويدىڭ كوروناۆيرۋس ەپيدەمياسى تۋرالى بولجالدى ستسەناريدىڭ ءۇش نۇسقاسىن تانىستىرعان. ونىڭ  ايتۋىنشا، بولجامعا اپتا سايىن تۇزەتۋلەر ەنگىزىلىپ وتىرادى. الەكسەي تسوي ۇسىنعان پەسسيميستىك ستسەناري بويىنشا، ەگەر جۇرتتىڭ 60 پايىزى عانا ماسكا تاقسا، 2020 جىلدىڭ قازان-جەلتوقسانىندا 190 مىڭ ادام ۆيرۋس جۇقتىرىپ، 65 مىڭ ادامدى اۋرۋحاناعا جاتقىزۋعا «تۋرا كەلەدى». مۇنداي جاعدايدا «جەلتوقساننىڭ ورتاسىندا لوكداۋن ەنگىزىلۋى ىقتيمال».

تاعى ءبىر نۇسقا رەاليستىك ستسەناريگە سايكەس، جۇرت اراقاشىقتىق ساقتاپ، 70 پايىزى ماسكا تاقسا، قازان-جەلتوقساندا 90 مىڭداي ادام ۆيرۋس جۇقتىرىپ، 30 مىڭىن اۋرۋحاناعا جاتقىزۋعا «تۋرا كەلەدى». بۇل جاعدايدا «قاڭتاردا لوكداۋن ەنگىزىلۋى مۇمكىن».

تسوي ەگەر جۇرتتىڭ 100 پايىزى ماسكا تاعىپ جۇرسە، قاتاڭ كارانتين بولمايتىنىن، قازان-جەلتوقساندا شامامەن 40 مىڭ ادامعا ۆيرۋس جۇعىپ، 15 مىڭ ادام اۋرۋحاناعا تۇسەتىنىن ايتادى.

پاندەميا كەزىندەگى مودەراتور ۆەدومستۆونىڭ باسشىسى كارانتيننىڭ باستى ينديكاتورى رەتىندە ەلدەگى اۋرۋحانالاردىڭ 70 پايىزى تولسا، قاتاڭ لوكداۋن جاريالاۋ كەرەكتىگىن مالىمدەدى.

پنەۆمونيانىڭ كوروناۆيرۋستىق تۇرىنەن باسقا اۋرۋلارىمەن اۋىرعاندار سانى 337 مىڭنان استى. تاراتىپ ايتساق، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 109 مىڭنان، 1 تامىزدان بەرگى كوروناۆيرۋس پنەۆمونياسى 35,5 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 144,5 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى جيىنى ۆيرۋس جۇققانداردىڭ 2735-ءى (كۆي+ / U07.1 – 1 783, كۆي- / U07.2 – 376, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"