قىتاي ادام قۇقىقتارى جونىندەگى كەڭەستىڭ جاڭا مۇشەسى بولدى. فوتو; VOA,

سەيسەنبىدە قىتاي ەش كەدەرگىسىز بۇۇ ادام قۇقىقتارى جونىندەگى كەڭەسىنىڭ مۇشەسى بولدى. ونىڭ قاتارىندا رەسەي مەن كۋبادا بار. حالىقارالىق قۇقىق قورعاۋ ۇيىمدارى بۇنى «قارالى كۇن» دەپ اتادى.

بۇۇ-نىڭ ادام قۇقىعى جونىندەگى كەڭەسىنە سايلانعان ەلدەر ءوز ەلىندە جانە ودان تىس جەرلەردە «ادام قۇقىقتارىن ىلگەرىلەتۋ مەن قورعاۋدىڭ جوعارى ستاندارتتارىن ۇستانۋعا» مىندەتتى. ترامپ اكىمشىلىگى بۇۇ-نىڭ بۇل كەڭەسىنەن 2018 جىلى شىعىپ كەتكەن بولاتىن. كەڭەستى ادام قۇقىعىن ورەسكەل بۇزعان ەلدەردى دە قۇرامىنا قوسقانى ءۇشىن ايىپتاپ كەلگەن.

اقش مەم.حاتشىسى مايكل پومپەو كەڭەستى قۇرامىنا «اۆتوريتارلىق رەجيمدەگى ەلدەردى قابىلداعانى» ءۇشىن ايىپتاپ مالىمدەمە جاسادى. ول سوزىندە اقش-تىڭ بۇۇ-عا مۇشە ەلدەردى اتالعان كەڭەستى قايتا رەفورمالاۋعا شاقىراتىنىن ايتتى.

«وكىنىشكە وراي، بۇل شاقىرۋلار ەلەنبەدى. بۇگىن بىرىككەن ۇلتتار ۇيىمىنىڭ باس اسسامبلەياسى تاعى دا ادام قۇقىقتارى تۋرالى قورقىنىشتى تاريحى بار ەلدەردى، سونىڭ ىشىندە قىتايدى، رەسەي مەن كۋبانى سايلاپ وتىر»، – دەدى اقش مەملەكەتتىك حاتشىسى.

بىرىككەن ۇلتتار ۇيىمىنىڭ ادام قۇقىقتارى جونىندەگى كەڭەسىنىڭ شتاب-پاتەرى جەنەۆادا ورنالاسقان جانە وعان 47 مەملەكەت مۇشە. بۇل رەت بىرىككەن ۇلتتار ۇيىمىنىڭ باس اسسامبلەياسىندا  ادام قۇقىعى جونىندەگى كەڭەستىڭ 15 جاڭا مۇشەسى جاسىرىن داۋىس بەرۋ ارقىلى سايلادى. ولار: بوليۆيا، ۇلىبريتانيا، قىتاي، كۋبا، فرانتسيا، گابون، كوت-د’يۆۋار، مالاۆي، مەكسيكا، نەپال، پاكىستان، رەسەي، سەنەگال، ۋكراينا جانە وزبەكستان. ولاردىڭ ءۇش جىلدىق مەرزىمى 2021 جىلدىڭ 1 قاڭتارىندا باستالادى.

“The Qazaq Times”