كوروناۆيرۋس ءولىمى ازايماي تۇر – جەكسەنبىدەگى جاعداي

قازاقستاندا 11 قازان كۇنى 74 ادامنان كوروناۆيرۋس، 34 ادامنان كوروناۆيرۋس پنەۆمونياسى انىقتالدى.

#كوروناۆيرۋس  11 قازان كۇنى كورونۆيرۋس جۇقتىرعان 154 ادام ايىعىپ شىقسا، 3 ادام ومىردەن وتكەن. ال جاڭادان تىركەلگەن ناۋقاستاردىڭ ەڭ كوبى – شقو (20), استانا (13), سقو جانە قاراعاندى وبلىستارى (12-دەن),  الماتى قالاسىنان (10). ال اقتوبە، الماتى جانە قىزىلوردا وبلىستارىندا بىردە-ءبىر ناۋقاس انىقتالماعان.

دەنميننىڭ رەسمي مالىمەتىنشە، ەمدەلىپ جاتقان 3022 ادامنىڭ 2030-ى اۋرۋحانادا. ال قالعان 992 ناۋقاس امبۋلاتورلىق تەراپيادا. ولاردىڭ اراسىندا 72 وسكىنشەك بالا بار. احۋالى ناشار 84 ناۋقاستىڭ اراسىندا 13 ادامنىڭ جاعدايى قاتتى قيىنداعان. جانە 11 ناۋقاس جاساندى جەلدەتۋ اپپاراتپەن تىنىستاپ جاتىر.

رەسپۋبليكا بويىنشا بارلىعى 108 831 ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 104 041 ادام. بۇل جالپى ناۋقاستاردىڭ 90%-دان استامى. وتكەن اپتانىڭ سارسەنبىسىنەن بەرى قازاقستاندا كوروناۆيرۋس كوبەيگەن ەدى. جەكسەنبى كۇنگى دەرەك دەنمين جانە اۋرۋحانالار دەمالىسقا بايلانىستى كۇرت كەميتىندىكتەن، سونشالىقتى شىنايى دەۋگە كەلمەيدى. بۇل بىرنەشە اي بويى بايقالعان ترەند.

#كوروناۆيرۋس_پنەۆمونياسى سونىمەن قوسا، جەكسەنبى كۇنى كوروناۆيرۋس پنەۆمونياسىنا شالدىققان 34 ادام، ءبىر ءولىم جاعدايى تىركەلگەن. تاعى 23 ادام ايىعىپ شىققان. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. رەسمي دەرەككە سايكەس، قازان ايىنىڭ ون ءبىر تاۋلىگىندە كوروناۆيرۋس جۇقتىرعان 852 ادام انىقتالىپ، 34 ادام قايتىس بولعان. ءدال وسى ۋاقىتتا كوروناۆيرۋس پنەۆمونياسىنا 1931 ادامنىڭ شالدىعىپ، 13 ادام قايتقان. پنەۆمونيادان اۋىرعانداردىڭ سانى كوروناۆيرۋسقا قارعاندا ەكى ەسە كوپ بولعانىمەن، – قايتىس بولعاندار پتر ارقىلى راستالعان كوۆيدتەن 2,6 ەسە از.

وتكەن تامىز جانە قىركۇيەك ايلارىندا قازاقستاندا كوروناۆيرۋس جۇقتىرعاندار 17 مىڭنان، ال كوروناۆيرۋس پنەۆمونياسىنا شالدىققاندار 34 مىڭنان اسقان. ەكەۋىن قوسا ەسەپتەگەندە، كەيىنگى ەكى ايدا ىندەتتەن 600-دەي قازاقستاندىق ومىردەن وتكەن. سونىمەن بىرگە، وسى ارالىقتا (تامىز-قىركۇيەك) جرۆي اۋرۋلارىمەن 418 مىڭنان، پنەۆمونيانىڭ باسقا تۇرلەرىمەن 82 مىڭنان استام جاعداي تىركەلگەن.

7 قازان دەنساۋلىق ساقتاۋ ءمينيسترى الەكسەي تسويدىڭ كوروناۆيرۋس ەپيدەمياسى تۋرالى بولجالدى ستسەناريدىڭ ءۇش نۇسقاسىن تانىستىرعان. ونىڭ  ايتۋىنشا، بولجامعا اپتا سايىن تۇزەتۋلەر ەنگىزىلىپ وتىرادى. الەكسەي تسوي ۇسىنعان پەسسيميستىك ستسەناري بويىنشا، ەگەر جۇرتتىڭ 60 پايىزى عانا ماسكا تاقسا، 2020 جىلدىڭ قازان-جەلتوقسانىندا 190 مىڭ ادام ۆيرۋس جۇقتىرىپ، 65 مىڭ ادامدى اۋرۋحاناعا جاتقىزۋعا «تۋرا كەلەدى». مۇنداي جاعدايدا «جەلتوقساننىڭ ورتاسىندا لوكداۋن ەنگىزىلۋى ىقتيمال».

تاعى ءبىر نۇسقا رەاليستىك ستسەناريگە سايكەس، جۇرت اراقاشىقتىق ساقتاپ، 70 پايىزى ماسكا تاقسا، قازان-جەلتوقساندا 90 مىڭداي ادام ۆيرۋس جۇقتىرىپ، 30 مىڭىن اۋرۋحاناعا جاتقىزۋعا «تۋرا كەلەدى». بۇل جاعدايدا «قاڭتاردا لوكداۋن ەنگىزىلۋى مۇمكىن».

تسوي ەگەر جۇرتتىڭ 100 پايىزى ماسكا تاعىپ جۇرسە، قاتاڭ كارانتين بولمايتىنىن، قازان-جەلتوقساندا شامامەن 40 مىڭ ادامعا ۆيرۋس جۇعىپ، 15 مىڭ ادام اۋرۋحاناعا تۇسەتىنىن ايتادى.

پاندەميا كەزىندەگى مودەراتور ۆەدومستۆونىڭ باسشىسى كارانتيننىڭ باستى ينديكاتورى رەتىندە ەلدەگى اۋرۋحانالاردىڭ 70 پايىزى تولسا، قاتاڭ لوكداۋن جاريالاۋ كەرەكتىگىن مالىمدەدى.

پنەۆمونيانىڭ كوروناۆيرۋستىق تۇرىنەن باسقا اۋرۋلارىمەن اۋىرعاندار سانى 337 مىڭنان استى. تاراتىپ ايتساق، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 109 مىڭعا، 1 تامىزدان بەرگى كوروناۆيرۋس پنەۆمونياسى 35 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 143 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.   پاندەميا باستالعالى جالپى جيىنى ۆيرۋس جۇققانداردىڭ 2712-ءسى (كۆي+ / U07.1 – 1 768, كۆي- / U07.2 – 368, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"