جەكسەنبىدەگى ەپيداحۋال: قازان ايى باستالعالى كوروناۆيرۋستان اۋىرعان بالالار ازايار ەمەس

2020 جىلعى 4 قازاندا ەلدە 59 ادامنان كوروناۆيرۋس، 37 ادامنان كوروناۆيرۋس پنەۆمونياسى انىقتالدى.

#كوروناۆيرۋس 5 قازان كۇنى كورونۆيرۋس جۇقتىرعان 72 ادام ايىعىپ شىقسا، 2 ادام ومىردەن وتكەن. ال جاڭادان تىركەلگەن ناۋقاستاردىڭ ەڭ كوبى – ادەتتەگىدەي شقو (14) جانە قاراعاندى وبلىسىنان (13). سونداي-اق، شىمكەنت قالاسى، ماڭعىستاۋ، تۇركىستان، قىزىلوردا، الماتى جانە اقتوبە وبلىستارىندا ناۋقاس مۇلدەم تىركەلمەگەن. بۇل جولى قاراعاندى وڭىرىندە ناۋقاستار كوبىرەك انىقتالعان. شىعىس قازاقستان وبلىسىنىڭ ىشكى ساياسات باسقارماسىنىڭ باسشىسى يرينا سميت QT رەداكتسياسىنىڭ ساۋالىنا بەرگەن جاۋابىندا وڭىردە «ينفەكتسيا وشاقتارى ءالى جويىلماۋى جانە كارانتين شارالارىنىڭ ساقتالماۋى» سەبەپتى كوروناۆيرۋس بويىنشا الدا كەلە جاتقانىن راستاعان.

دەنمين-ءنىڭ رەسمي مالىمەتىنشە، ەمدەلىپ جاتقان 3213 ادامنىڭ 1806-سى اۋرۋحانالاردا. ال قالعان 1407 ناۋقاس امبۋلاتورلىق تەراپيادا. ولاردىڭ اراسىندا 73 (1 قازان 64, 2 قازان 70, 3 قازان 74 بالا ەدى – QT) بالا بار. احۋالى ناشار 89 ناۋقاستىڭ اراسىندا 12 ادامنىڭ جاعدايى قاتتى قيىنداعان. جانە 19 ناۋقاس جاساندى جەلدەتۋ اپپاراتپەن تىنىستاپ جاتىر.

رەسپۋبليكا بويىنشا بارلىعى 108 236 ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 103 277 ادام. بۇل جالپى ناۋقاستاردىڭ 90%-دان استامى.

#كوروناۆيرۋس_پنەۆمونياسى سونىمەن قوسا، جەكسەنبى كۇنى كوروناۆيرۋس پنەۆمونياسىنا شالدىققان 37 ادام، ەكى ءولىم جاعدايى تىركەلگەن. سونداي-اق، 57 ادام جازىلىپ شىققان. بىراق ولاردىڭ قانشاسى قاي ايماقتان ەكەنى بەلگىسىز. پتر تەستى تەرىس قورىتىندى كورسەتكەنىمەن، كوروناۆيرۋس سالدارىنان قابىنعان اقوكپە اۋرۋىنىڭ ايماقتارعا تارالۋ دەرەگىن تۇراقتى تۇردە جاريالاۋعا ۋادە ەتكەن مينيستر الەكسەي تسوي دا، ونىڭ كومەكشىسى، ۆەدومستۆونىڭ رەسمي وكىلى باعدات قوجاحمەتوۆ تە ءسوزىن بۇرمالاپ، ءار ون كۇن سايىن جاريالاۋعا كوشكەن. كوروناۆيرۋس پنەۆمونياسىنىڭ وڭىرلەردەگى كۇندەلىكتى ديناميكاسى بەلگىسىز. قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... تامىز جانە قىركۇيەك ايلارىندا قازاقستاندا كوروناۆيرۋس جۇقتىرعاندار 17 مىڭنان، ال كوروناۆيرۋس پنەۆمونياسىنا شالدىققاندار 33 مىڭنان اسقان. ەكەۋىن قوسا ەسەپتەگەندە، كەيىنگى ەكى ايدا ىندەتتەن 600-دەي قازاقستاندىق ومىردەن وتكەن. سونىمەن بىرگە، وسى ارالىقتا (تامىز-قىركۇيەك) پنەۆمونيانىڭ باسقا تۇرلەرىمەن 82 مىڭنان استام جاعداي تىركەلگەن.

ددسۇ مالىمەتىنشە، قازاقستاندا اۋىرعانداردىڭ سانى 141 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى جيىنى ۆيرۋس جۇققانداردىڭ 2682-ءسى (كۆي+ / U07.1 – 1 746, كۆي- / U07.2 – 360, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

“The Qazaq Times”