نيكول پاشينيان: ارمەنيا تاۋلى قاراباقتىڭ دەربەستىگىن مويىنداۋى ءتيىس

ءازىربايجان مەن ارمەنيا اراسىنداعى قاقتىعىس ءالى باسىلعان جوق. تاراپتار ورتاق كەلىسىمگە كەلە الماعاندىقتان، شەكارادا وت اتىلعان. زاردابىن جەرگىلىكتى تۇرعىندار كورىپ جاتىر. تhe frontier post سايتىنىڭ جازۋىنشا، ءازىربايجان پرەزيدەنتى يلحام اليەۆ قاقتىعىستى دەرەۋ توقتاتۋعا شاقىرعان. ال ۇجىمدىق قاۋىپسىزدىك كەلىسىمشارت ۇيىمى اياسىنداعى ءوزارا ارەكەتتەسۋ جونىندەگى سۇراقتارعا جاۋاپ بەرگەن ارمەنيا پرەمەر-ءمينيسترى نيكول پاشينيان «حالىق قاۋىپسىزدىگى ءۇشىن تاۋلى قاراباقتىڭ دەربەستىگىن مويىنداۋ كەرەك»، دەگەن پىكىر ءبىلدىردى.

حالىقارالىق ماسەلە جونىندە سۇحبات بەرگەن پاشينيان:  «كۇن تارتىبىمىزدە تاۋلى كاراباح دەربەستىگىن ارمەنيا تاراپىنىڭ مويىنداۋىنا قاتىستى ساۋال بار ەكەنىن جاريالاعان بولاتىنبىز. ارمەنيا جانە تاۋلى كاراباح اراسىندا ستراتەگيالىق ىنتىماقتاستىق جونىندە كەلىسىمگە قول قويۋدى دا قاراستىرىپ وتىرمىز. كەشە ۇجىمدىق قاۋىپسىزدىك كەلىسىمشارت ۇيىمىنىڭ الاڭىندا قازىرگى جاعداي تالقىعا سالىندى. ءبىز ەلىمىزدىڭ قاۋىپسىزدىگىن قامتاماسىز ەتۋگە ءتيىستى بارلىق شارانى قابىلدايمىز. ۇجىمدىق قاۋىپسىزدىك كەلىسىمشارت ۇيىمىنىڭ بۇعان قاتىسۋ-قاتىسپاۋى – بۇل بولەك ماسەلە. ءبىز قالىپتاسقان جاعدايعا بايلانىستى جانە گەوساياسي تۇرعىدان بارلىق مۇمكىندىكتى تالقىلاپ جاتىرمىز. ارمەنيا قارۋلى كۇشتەرىنىڭ ەل قاۋىپسىزدىگىن قامتاماسىز ەتۋگە قاۋقارى جەتەدى جانە ءبىز ۇندەۋ جاسايتىنداي جاعدايعا جەتكەن جوقپىز دەپ سانايمىز»، – دەيدى.

تاۋلى كاراباح ءۇشىن ەرەۆان مەن باكۋ اراسىنداعى تەكەتىرەس 30 جىل بويى جالعاسىپ كەلەدى. تۇرعىندارىنىڭ دەنى ارمياندار كاراباح 1991 جىلى ازەربايجاننان تاۋەلسىزدىگىن جاريالاعان بولاتىن. وسىدان كەيىن ايماقتا قاقتىعىس باستالىپ، تەك 1994 جىلى رەسەيدىڭ ارااعايىندىعىمەن ازەربايجان، ارمەنيا جانە دەربەستىگىن جاريالاعان تاۋلى كاراباح اتىستى توقتاتۋ كەلىسىمىنە قول قويدى.

27 قىركۇيەكتە ارمەنيا پرەمەر-ءمينيسترى نيكول پاشينيان ءازىربايجان قارۋلى كۇشتەرى تاۋلى قاراباق باعىتىندا شابۋىل باستاعانىن ايتتى. ارمەنيا ءسىم مالىمەتىنشە، ءازىربايجان ارمياسى ەلدى مەكەندەردى، سونىڭ ىشىندە تانىلماعان ستەپاناكەرت رەسپۋبليكاسىنىڭ استاناسىن بومبالاعان. ءوز كەزەگىندە ءازىربايجان قورعانىس مينيسترلىگى ءازىربايجان ارمياسى ارميان تاراپىنىڭ بايلانىس جولىنداعى ارەكەتتەرىنە جاۋاپ رەتىندە شارالار قابىلداپ، جاعدايدى باقىلاۋدا دەپ مالىمدەدى. كەيىننەن ارمەنيا، ءازىربايجان جانە تانىلماعان تاۋلى قاراباق رەسپۋبليكاسىندا اسكەري جاعداي ەنگىزىلدى.

ەرەۆان 28 قىركۇيەككە قاراعان ءتۇنى اتىس تولاستاماعانىن ايتسا، باكۋ ارميان كۇشتەرىنىڭ تەرتەر قالاسىن اتقىلاعانىن حابارلادى. بيىل شىلدەدە ءازىربايجاننىڭ توۆۋز وبلىسى مەن ارمەنيانىڭ تاۆۋش وبلىسى اراسىنداعى شەكارادا اتىس بولعان. شەتەلدىك باسىلىمدار ارمەنيا اسكەرى قاقتىعىس كەزىندە ازىربايجانمەن شەكارالاس ايماقتى تاس-تالقان ەتكەنىن جازدى. سول كۇنى توۆۋز كەنتىندە ءاربىر 15-20 مينۋت سايىن وق اتىلعان. ءازىربايجان حالقى جەر-جەردە ميتينگ ۇيىمداستىرىپ، بيلىكتىڭ ارمەنياعا قارىمتا سوققى بەرۋىن تالاپ ەتتى.

"The Qazaq Times"