كورنەكى سۋرەت. فوتو: anapa-official.ru

قازاقستاندا COVID پاندەمياسى باستالعالى بەرى 12 830 مەديتسينا قىزمەتكەرى اۋىرىپ، 197-ءسى قايتىس بولعان. بىراق بيلىك ۋادە ەتكەن قىزمەتتىك وتەماقى العاندار سانى تىم از.  

ءماجىلىس دەپۋتاتى زاۋرەش امانجولوۆا ۇكىمەت باسشىسىنا جولداعان دەپۋتاتتىق ساۋالىندا كوروناۆيرۋس جۇقتىرعان مەدقىزمەتكەرلەرگە تولەمنىڭ ۋاقىتىلى تولەنبەۋ ماسەلەسىن كوتەردى.

«مينيسترلىكتىڭ دەرەگىنشە، 22 قىركۇيەك كۇنگى اقپارات بويىنشا 12 830 مەديتسينا قىزمەتكەرىنە كوروناۆيرۋس جۇققان. ەڭبەك مينيسترلىگىنىڭ كۇن سايىن تاراتىپ جۇرگەن مالىمەتىنە سايكەس، وسىعان دەيىن 2 475 – ياعني، ناۋقاستاردىڭ 19 پايىزىنان عانا ءوتىنىش تۇسكەن. ال بىرىڭعاي الەۋمەتتىك تولەمدى تەك 1830 ادام نەمەسە 14,3 پايىزى عانا العان.  كوروناۆيرۋستان قايتىس بولعان دارىگەرلەردىڭ وتباسىنا وتەماقى تولەۋ جۇمىسى مۇلدە ناشار. بۇگىنگە دەيىن ىندەتتەن 197 مەديتسينا قىزمەتكەرى كوز جۇمسا، دەنساۋلىق ساقتاۋ مينيسترلىگىنەن تولەمگە تەك 38 ءوتىنىش قانا تۇسكەن. ال وتەماقىنى العاندار سانى نەبارى – 25 نەمەسە مارقۇمداردىڭ 12,7 پايىزى عانا»، – دەدى دەپۋتات امانجولوۆا.

بيۋروكراتيادان ارىلىپ بولماعان ۇكىمەتتى سىناعان دەپۋتاتتىڭ پىكىرىنشە، دەنساۋلىق ساقتاۋ مينيسترلىگى مەن ەڭبەك مينيسترلىگىنىڭ جۇمىسى «باياۋ ءارى سىلبىر» بولعاندىقتان توقاەۆتىڭ تاپسىرماسى دەر كەزىندە ورىندالماي جاتىر.

«دەنساۋلىق ساقتاۋ جانە ەڭبەك مينيسترلىكتەرى ءوزارا ءىس-قيمىل الگوريتىمىن ۋاقىتىلى پىسىقتاماعان. سالدارىنان وسىنداي پروبلەمالار تۋىنداپ وتىر. وسى ايتىلعانداردى ەسكەرىپ، سىزدەن بۇل ماسەلەنى جەكە باقىلاۋعا الۋدى سۇرايمىز»، – دەدى ول اسقار مامينگە جولداعان ساۋالىندا.

ءماجىلىس توراعاسى نۇرلان نىعماتۋلين جاقىن ارادا «ەسكى كوماندانىڭ ورنىنا وزىنىكىن جيىپ بولا الماي جاتقان»، جۋرناليستەرگە جاۋاپ بەرۋگە «قولى تيمەيتىن»، ەسەسىنە بلوگەرلەرمەن سۇقباتتاسۋعا ۋاقىت تاۋىپ، ۇشىپ كەلە الاتىن دەنساۋلىق ساقتاۋ ءمينيسترى الەكسەي تسوي وسى ماسەلە بويىنشا ماجىلىسكە شاقىرىلاتىنىن ايتتى.

"The Qazaq Times"