بەلارۋس پرەزيدەنتى الەكساندر لۋكاشەنكو. فوتو; ەرا

ەۋرووداق ءسامميتى الدىندا ۇيىمعا مۇشە ەلدەردىڭ سىرتقى ىستەر مينيسترلەرى بەلارۋسكە قارسى سانكتسيالار قابىلداۋ، الەكسەي ناۆالنىي توڭىرەگىندەگى احۋال جانە ليۆياداعى جاعدايدى تالقىلادى. بۇل تۋرالى The Guardian باسىلىمى حابارلادى.

وداق قۇرامىنداعى ەلدەردىڭ باسىم بولىگى بەلارۋستىڭ رەسمي وكىلدەرىنە سانكتسيا ەنگىزۋدى قولادى. بىراق كيپر مەملەكەتىنىڭ ۇستانىمى كەدەرگى كەلتىرىپ وتىر. بۇل ەل باسشىلىعى ءوز اۋماعى سانايتىن جەرورتا تەڭىزىنىڭ بولىگىندە تۇركيانىڭ گەولوگيالىق بارلاۋ جۇمىستارىن جۇرگىزىپ جاتقانىنا نارازى. سوندىقتان بۇل تاراپ «انكاراعا قارسى جازا قولدانىلماسا، مينسكىگە سانكتسيالار ەنگىزۋدى قولدامايمىز»، دەيدى.

بۇل جونىندە پىكىر بىلدىرگەن كيپر سىرتقى ىستەر ءمينيسترى نيكوس حريستودۋليدەس: «باستى قۇندىلىقتارىمىز بەن قاعيداتتارىمىزدى بۇزعان ەلدەرگە ۇستانىم بىردەي بولۋى كەرەك. ءبىرىن جازالاپ، ءبىرىن شاراسىز قالدىرۋعا بولمايدى. ديپلوماتيادا تىعىرىققا تىرەلمەۋىمىز كەرەك دەپ سانايمىن. مەن گيمنيحتە وتكەن ەۋرووداققا مۇشە ەلدەردىڭ بەيرەسمي كەزدەسۋىندە قابىلداعان ساياسي شەشىمدى جۇزەگە اسىرۋعا دايىنمىن», – دەيدى.

تاراپتاردىڭ پىكىرلەرى ورتاق بولماعاندىقتان، بەلارۋسكە سانكتسيا ەنگىزۋ ماسەلەسى تاعى كەيىنگە شەگەرىلدى. ال بەلارۋس وپپوزيتسياسىنىڭ وكىلى سۆەتلانا تيحانوۆسكايا لۋكاشەنكو مەن ونىڭ توبىنا (زاڭدى جانە جەكە تۇلعالار) قارسى قاتاڭ قاۋلى قابىلداۋدى ۇسىنىپ كەلەدى.

9 تامىزدا بەلارۋستە پرەزيدەنت سايلاۋى ءوتتى. ورتالىق سايلاۋ كوميسسياسى قازىرگى مەملەكەت باسشىسى الەكساندر لۋكاشەنكو 80,10% داۋىسپەن جەڭىسكە جەتكەنىن جاريالادى. ونىڭ باستى باسەكەلەسى، وپپوزيتسيا اتىنان قاتىسقان سۆەتلانا تيحانوۆسكايا 10,12% داۋىسقا يە بولدى.

تيحانوۆسكايا سايلاۋ قورىتىندىسى بويىنشا ورتالىق سايلاۋ كوميسسياسىنا شاعىم ءتۇسىردى. ەكزيت-پولدىڭ ناتيجەلەرى 9 تامىز كەشكە جاريالانعاننان كەيىن مينسكتىڭ ورتالىعىندا جانە رەسپۋبليكانىڭ كەيبىر باسقا قالالارىندا جاپپاي نارازىلىق باستالدى. شەرۋگە شىققانداردى قۇقىق قورعاۋ ورگاندارىنىڭ قىزمەتكەرلەرى سوققىعا جىعىپ، كوز جاساۋراتاتىن گاز قولدانعان.

ەلدەگى احۋالدان كەيىن ەۋروپالىق وداق پەن اقش بەلارۋسكە سانكتسيا ەنگىزۋ ماسەلەسىن قاراستىرعان. سانكتسيا 21 قىركۇيەكتە كۇشىنە ەنۋى ءتيىس ەدى.

"The Qazaq Times"