ابە وتستاۆكاسى: جاپونيادا ۇكىمەتتىڭ جاڭا قۇرامى جاريالاندى

جاپونيانىڭ 71 جاستاعى جاڭا پرەمەر-ءمينيسترى يوسيحيدە سۋگا ۇكىمەتىنىڭ قۇرامى جاريالاندى. جۋرناليستەر الدىنداعى ءتىزىمدى جاپونيا مينيسترلەر كابينەتىنىڭ جاڭا باس حاتشىسى كاتسۋنوبۋ كاتو وقىدى. بۇل تۋرالى ۆۆس اگەنتتىگى حابارلادى.

بۇرىنعى پرەمەر-مينيستر سيندزو ابەگە قاراستى مينيسترلەر كابينەتىنىڭ بىرقاتار شەندىلەرى جاڭا ۇكىمەتتە ءوز لاۋازىمدارىن ساقتاپ قالدى. ەندى جاڭا ۇكىمەتتە دە قىزمەتن جالعاستىراتىن شەندىلەر قاتارىندا سىرتقى ىستەر ءمينيسترى توسيميتسۋ موتەگي، قارجى ءمينيسترى تارو اسو، مەملەكەتتىك جەر، ينفراقۇرىلىم، كولىك جانە تۋريزم ءمينيسترى كادزۋەسي اكابا، وليمپيادا جانە پاراليمپيادا ءمينيسترى سەيكو حاشيموتو جانە ەل ەكونوميكاسىن قالپىنا كەلتىرۋ ءمينيسترى ياسۋتوسي نيشيمۋرا بار.

جاپونيانىڭ ەكونوميكا، ساۋدا جانە ونەركاسىپ ءمينيسترى حيروسي كاجياما مەن قورشاعان ورتانى قورعاۋ ءمينيسترى سيندزيرو كويدزۋمي دە قايتا تاعايىندالدى. سونىمەن بىرگە قورعانىس ءمينيسترى تارو كونو اكىمشىلىك رەفورمانى جۇرگىزۋگە جاۋاپتى مەملەكەتتىك مينيستر رەتىندە قىزمەتىنەن كەتتى. ونىڭ ورنىنا سيندزو ابەنىڭ ءىنىسى نوبۋو كيسي كەلدى.

سارسەنبىدە بيلەۋشى ليبەرالدى-دەموكراتيالىق پارتيانىڭ (لدپ) جاڭا توراعاسى، ەلدىڭ جاڭا پرەمەر-ءمينيسترى بولىپ يوسيحيدە سۋگا بەكىتىلدى. ونىڭ كانديداتۋراسىنا ۇلتتىق پارلامەنتتىڭ ەكى پالاتاسى دەپۋتاتتارىنىڭ كوپشىلىگى داۋىس بەردى. پارتيالىق جارعىعا سايكەس، ول بۇل لاۋازىمدى 2021 جىلدىڭ قىركۇيەگىنە دەيىن، ياعني وتستاۆكاعا كەتكەن ابە مەرزىمى اياقتالعانعا دەيىن اتقارادى. وسىدان كەيىن ستاندارتتى ءۇش جىلدىق مەرزىمگە جاڭا توراعا سايلاۋى وتەدى.

28 تامىزدا جاپونيا پرەمەر-ءمينيسترى سيندزو ابە دەنساۋلىعىنىڭ ناشارلاۋىنا بايلانىستى وتستاۆكاعا كەتۋ تۋرالى شەشىم قابىلدادى. سوڭعى ەكى اپتادا ابەنىڭ دەنساۋلىعى ناشارلاعان. تامىزدىڭ باسىندا جاپوندىق Flash اپتالىعىندا 6 شىلدەدە ابە ءوزىنىڭ جۇمىس كابينەتىندە قان قۇسىپ، اۋىر جاعدايدا بولعانى ايتىلدى. ال ابەنىڭ ءوزى جۋرناليستەرگە ءوزىن جاقسى سەزىنەتىنىن ايتقان.

2007 جىلى جاپون مينيسترلەر كابينەتىنىڭ باسشىسى ىشەك اۋرۋىنا بايلانىستى وتستاۆكاعا كەتكەن بولاتىن.

"The Qazaq Times"