قىتاي مەن ءۇندىستان شەكاراسىندا تاعى دا جانجال بولدى. بۇل رەت شەكارا ايماعىندا وق اتىلدى، بىراق قازا بولعاندار تۋرالى  مالىمەت جوق.

كەشە، 8 قىركۇيەك قىتايدىڭ باتىس اسكەري قولباسشىلىق شتافىنى رەسمي مالىمدەمە تاراتىپ: «ءۇندى ساربازدارى دۇيسەنبى كۇنى شەكارانى زاڭسىز كەسىپ ءوتىپ، باتىس شەكاراداعى بانگۋڭ كولىنىڭ وڭتۇستىك جاعالاۋىنداعى شىنپاۋ تاۋلى ايماعىنا كىردى. قىتاي شەكارا كۇزەتىنە قاۋىپتى ارەكەتتەر تۋدىرعاندىقتان، شەكارا كۇزەتى قارسى شارا قابىلداۋعا ءماجبۇر بولدى»، – دەگەن. الايدا، ءۇندىستان ساربازدارىنا قارسى قىتاي تارابى قانداي شارالار قابىلداعانى انىق ايتىلماعان. سونداي-اق، مالىمدەمەدە ءۇندىستاندى اۋىر اسكەري ارانداتۋشىلىق جاسادى دەپ ايىپتاعان.

قىتاي تارابىنىڭ مالىمدەمەسىنەن كەيىن ءۇندىستان قورعانىس مينيسترلىگى دە مالىمدەمە جاسادى. وندا قىتايدىڭ باتىس اسكەري قولباسشىلىق شتابى جاساعان مالىمدەمە ىشكى جانە حالىقارالىق قوعامدىق پىكىردى بۇرمالاۋ ءۇشىن جاسالعان دەلىنگەن. ءۇندى قورعانىس مينيسترلىگى ءوز مالىمدەمەسىندە ساربازدارىنىڭ اتالعان شەكارا سىزىعىنان مۇلدە وتپەگەنىن جانە قىتاي شەكاراشىلارىنا قاۋىپ تۋدىراتىن ارەكەتتەرگە بارماعانىن ايتقان.

ءۇندىستان تارابىنىڭ رەسمي مالىمدەمەسىندە، 7 قىركۇيەك كۇنى قىتاي اسكەرلەرى ءۇندى شەكارا قاراۋىلدارى ورنالاسقان جەرگە جاقىن كەلمەك بولعانى، ماقساتتارىنا جەتە الماعاندىقتان قورقىتۋ ماقساتىندا اسپانعا وق اتقانى ايتىلعان. «ءۇندى ساربازدارى بايىپتىلىق تانىتىپ، قاقتىعىستى بولدىرماۋعا تىرىستى. الايدا، ءۇندىستان ارمياسى ءوز تەرريتورياسىن بەرىك قورعايتىنىن انىق كورسەتە الدى»، – دەلىنگەن ءۇندىستان قورعانىس مينيسترلىگىنىڭ مالىمدەمەسىندە.

ماۋسىم ايىندا ءۇندى-قىتاي شەكاراشىلارى اراسىندا قاقتىعىس بولىپ، ءۇندىستاندىۇ 20 سارباز قازا تاپقان. قىتاي تارابى قازا بولعاندار سانىن جاريا ەتپەگەن. بۇل قىتاي مەن ءۇندىستان اراسىنداعى سوڭعى 50 جىلداعى ەڭ ۇلكەن قاندى قاقتىعىس سانالادى.

4 قىركۇيەك كۇنى ەكى ەلدىڭ قورعانىس مينيسترلەرى ماسكەۋدىڭ ارا اعايىندىق ەتۋىمەن ۇستەل باسىندا كەزدەسكەن ەدى. الايدا، ەشقانداي جەتىستىككە قول جەتكىزە المادى. قىتاي قورعانىس ءمينيسترى ۆەي فىڭحى لاداح شەكارا ايماعىنداعى داۋ-جانجالدىڭ بارلىق جاۋاپكەرشىلىكتى ۇندىستانعا ارتتى. سونداي-اق قىتاي تارابى كەلىسسوز ءۇشىن ءبىر سۇيەم جەر دە جوعالتپايدى دەگەن پوزيتسياسىن ءبىلدىردى.

حالىقارالىق ىقپالدى اقپارات قۇرالدارى دا ءۇندىستان مەن قىتايىدىڭ قازىرگى جانجالىنا نازار اۋدارىپ وتىر. اسكەري ساراپشىلاردىڭ پىكىرىنشە، ەكى ەلدىڭ شەكاراداعى قاقىتعىس قاۋپىن بولجاۋ مۇلدە قيىن. كەز-كەلگەن ۋاقىتتا اۋقىمدى قاقتىعىستار بولىپ كەتۋ مۇمكنىدىگى جوعارى. تاراپتاردىڭ قاتال شەشىمدەرى ەكى ەلدى دە وزدەرى قالامايتىن سوعىسقا الىپ كىرۋى مۇمكىن دەپ بولجايدى.

“The Qazaq Times”