«قىستىڭ قامىن جازدا ويلا» – ەۋروپا وداعى ىندەتتىڭ ەكىنشى تولقىنى جاڭا قورقىنىش تۋدىرۋى مۇمكىن دەپ كۇتىلگەن الداعى قىس مەزگىلىنە دايىندىق كورىپ جاتىر. ەۋروپانىڭ تىزگىن ۇستاۋشىلارى «كارانتينسىز قىس» جوسپارىن دايىنداۋدا. ياعني، جازداعى كارانتين شارالارىنسىز، ىندەتپەن قاتار قىتىمىر قىستان شىعۋدىڭ وزگە جولدارىن تاپپاق.

كارانتين شارالارى ىندەتتىڭ جايىلۋىن ازايتاتىن ءونىمدى شارالاردىڭ ءبىرى بولعانىمەن، قوعامعا جانە ەكونوميكاعا اۋىرلىقتار الىپ كەلدى. سوندىقتان دا، ەكونوميكالىق ءوسىمدى قاتتى قاداعالاپ وتىراتىن ەۋروپا ەلدەرىنىڭ ليدەرلەرى تولىقتاي وقشاۋلاۋ شاراسىن قابىلداماي-اق، ۆيرۋستىڭ تارالۋىن شەكتەيتىن جاڭا تاسىلدەردى تابۋدىڭ ماڭىزدىلىعىن باسا ايتىپ وتىر.

نە دەگەنمەن، الەم حالقى ۆيرۋسپەن قاتار ءومىر سۇرۋگە ۇيرەنە باستادى دەسە دە بولادى. بەتپەردە كيۋ، الەۋمەتتىك ارالىقتى ساقتاۋ، جەكە جانە الەۋمەتتىك ورناتىڭ تازالىعىنا كوڭىل ءبولۋ، مۇمكىندىگىنشە ونلاين جۇمىس ىستەۋگە ءوتۋ سەكىلدى. بىراق، سونىڭ ىشىندە ەۋروپالىقتاردىڭ جاڭا سىناققا تاعى دا ەرتەرەك بەيمدەلگەنىن كورىپ وتىرمىز. ۆيرۋستىڭ تارالۋىن شەكتەيتىن قاراپايىم تاسىلدەردى جالپىلاستىرۋدا دا ەۋروپا ەلدەرى ءوزىنىڭ ۇلگىسىن كورسەتتى. ەڭ قىزۋ قاندى ەۋروپالىق سانالاتىن يسپاندار مەن يتاليالىقتار دا جاڭا سالتتارعا كوندىگە باستاعانداي. ەڭ باستىسى مەديتسيناسى اۋىر سىناقتان جاۋىر بولسا دا ءوتىپ شىقتى. سوندىقتان، ەندى ەۋروپا ەلدەرى ىندەتتىڭ ەكىنشى تولقىنىنان شۆەدتەردىڭ جولىمەن ءجۇرىپ وتەمىز دەسىپ وتىر.

ىندەتتىڭ العاشقى تولقىنى كەلىپ سوققاندا ەۋروپا وداعىنا مۇشە 27 ەل ءبىر-بىرىمەن شەكاراسىن جاۋىپ، تاس-ءتۇيىن بەكىنگەن ەدى. ناتيجەسىندە بۇدان ەو ەكونوميكاسى اۋىر سوققى الىپ، ءبىر عانا جازدا 1 ترلن ەۆرو جوعالتتى. 8 پايىزعا تومەندەگەن وسىممەن الەمدەگى ەكونوميكالىق قۇلدىراۋ جاعىنان امەريكادان كەيىنگى ەكىنشى ورىنعا جايعاستى. ەۋروپاداعى قىزمەت وتەۋ كاسىبى 16,4 پايىزعا قىسقارىپ، تۋريزم بولسا 75 پايىزعا دەيىن توقىراۋعا ۇشىراعان.

وسىدان كەيىن ەۋروپا ەكىنشى تولقىن ىندەتكە كارانتينسىز دايىندالۋعا شەشىم قابىلداپ وتىر. ول ءۇشىن ەۋروپانىڭ تاعدىرى جەكەلەگەن ەۋروپالىقتاردىڭ قولىندا بولماق. ايتالىق، جەكە ادامداردىڭ قاۋىپسىزدىك ەرەجەلەرىن ورىنداۋى تۇتاس قوعامنىڭ قاۋىپسىزدىگىنە تىكەلەي اسەر ەتپەك. سول ارقىلى ەكونوميكالىق قۇلدىراۋدىڭ الدىن الۋعا تىرىسىپ باعۋدا.

"The Qazaq Times"