ەگەر نارازىلىق بىلدىرۋشىلەر رەسمي وكىلدەرگە قارسى شىقسا، بەلارۋس ىشكى ىستەر مينيسترلىگى جاۋاپ رەتىندە كۇش قولداناتىنىن حابارلادى. ءدال قازىرگى ۋاقىتتا جۇزدەن استام نارازىلىق بىلدىرۋشىلەر قاماۋعا الىنعان. ازاماتتىق بەلسەندىلەردى ۇستاۋ جالعاسۋدا. 

ەۋروپالىق وداق بەلارۋسكە قارسى سانكتسيالارى 21 قىركۇيەكتە كۇشىنە ەنەتىنىن مالىمدەدى. ولار سونداي-اق سانكتسيالار ءتىزىمىن كەڭەيتۋگە بولاتىنىن ايتتى. سانكتسيا ماقساتى – بەلارۋس بيلىگى مەن وپپوزيتسياسى اراسىنداعى كەلىسسوزدەردى باستاۋ.

ليتۆا سىرتقى ىستەر مينيسترلىگى بەلارۋسكە قارسى شەكتەۋ ەنگىزبەۋ – ەۋرووداقتىڭ سىرتقى ساياساتىنا نۇقسان كەلتىرەدى دەيدى. مينيسترلىك باسشىسى ليناس لينكياۆيچيۋس بريۋسسەلدى بەلارۋس وپپوزيتسياسىنا كومەك كورسەتۋگە شاقىردى.

5 قىركۇيەكتە «ارريا فورمۋلاسى» بويىنشا دۇنيەجۇزىلىك ۇيىمنىڭ قاۋىپسىزدىك كەڭەسىنىڭ بەيرەسمي وتىرىسىندا بەلارۋس احۋالى تالقىلانىپ، سۆەتلانا تيحانوۆسكايا مالىمدەمە جاساعان. وپپوزيتسيا وكىلى تيحانوۆسكايا بۇۇ-دان كومەك سۇراپ، بيلىك اۋىسپايىنشا، نارازىلىق شەرۋلەرى باسىلمايتىنىن ايتتى.

9 تامىزدا بەلارۋستە پرەزيدەنت سايلاۋى ءوتتى. ورتالىقسايلاۋ كوميسسياسى قازىرگى مەملەكەت باسشىسى الەكساندر لۋكاشەنكو 80,10% داۋىسپەن جەڭىسكە جەتكەنىن جاريالادى. ونىڭ باستى باسەكەلەسى، وپپوزيتسيا اتىنان قاتىسقان سۆەتلانا تيحانوۆسكايا 10,12% داۋىسقا يە بولدى.

تيحانوۆسكايا سايلاۋ قورىتىندىسى بويىنشا ورتالىق سايلاۋ كوميسسياسىنا شاعىم ءتۇسىردى. ەكزيت-پولدىڭ ناتيجەلەرى 9 تامىز كەشكە جاريالانعاننان كەيىن مينسكتىڭ ورتالىعىندا جانە رەسپۋبليكانىڭ كەيبىر باسقا قالالارىندا جاپپاي نارازىلىق باستالدى. شەرۋگە شىققانداردى قۇقىق قورعاۋ ورگاندارىنىڭ قىزمەتكەرلەرى سوققىعا جىعىپ، كوز جاساۋراتاتىن گاز قولدانعان. ىشكى ىستەر مينيسترلىگىنىڭ حابارلاۋىنشا، ميتينگتەر كەزىندە 6 مىڭنان استام ادام ۇستالدى، بىرنەشە پوليتسيا قىزمەتكەرلەرى مەن دەمونسترانتتار جاراقات الدى.

"The Qazaq Times"