بەلارۋس پرەزيدەنتتىگىنە ۇمىتكەر بولعان سۆەتلانا تيحانوۆسكايا بۇۇ-دان رەسپۋبليكاعا باقىلاۋ ميسسياسىن جىبەرۋدى سۇرادى. اتالعان ماسەلە «ارريا فورمۋلاسى» بويىنشا دۇنيەجۇزىلىك ۇيىمنىڭ قاۋىپسىزدىك كەڭەسىنىڭ بەيرەسمي وتىرىسىندا تالقىلاندى.

تيحانوۆسكايا بايانداماسىندا «ءبىز بۇۇ-نى ەلدەگى احۋالدى رەتتەۋ ءۇشىن بەلارۋسكە باقىلاۋ ميسسياسىن جىبەرۋدى سۇرايمىز. بارلىق ساياسي تۇتقىنداردى تەز ارادا بوساتۋدى تالاپ ەتەمىز. وسى ۋاقىتقا دەيىن سەرگەي تيحانوۆسكي، ۆيكتور باباريكو، پاۆەل سەۆەرەنەتس، ولگا كوۆالكوۆا، سەرگەي ديلەۆسكي، ميكولا ستاتكەۆيچ جانە تاعى ونشاقتى ازاماتتىق قوعام بەلسەندىلەرى قاماۋعا الىنعان»، – دەدى.

سونداي-اق وپپوزيتسيونەر بەلارۋس بيلىگىنەن وپپوزيتسيانى ۇيلەستىرۋ كەڭەسىنىڭ مۇشەلەرى – سۆەتلانا الەكسيەۆيچ، ولگا كوۆالكوۆا، پاۆەل لاتۋشكو، سەرگەي دىلەۆسكي، ماريا كولەسنيكوۆا، ماكسيم زناكقا قىسىم كورسەتۋدى توقتاتۋىن تالاپ ەتتى.

بەلارۋستەگى جاعداي بويىنشا كەزدەسۋ «ارريا فورمۋلاسى» اياسىندا ءوتىپ جاتىر، ياعني ول بەيرەسمي جيىن سانالادى. پروتسەسس ۆەنەسۋەلا ەلشىسى ديەگو ارريانىڭ ەسىمىمەن اتالعان. بۇل تاجىريبە 1992 جىلى باستالعان.
قاۋىپسىزدىك كەڭەسىنىڭ كەز كەلگەن مۇشەسى، قوعام قايراتكەرلەرى نەمەسە ۇەۇ سپيكەرلەرى اتالعان فورماتتاعى ماجىلىستەردى ۇيىمداستىرا الادى. باسقا مەملەكەتتەر بۇل كەزدەسۋگە توسقاۋىل قويا المايدى، بىراق ول قاۋىپسىزدىك كەڭەسىنىڭ پالاتاسىندا وتكىزىلمەيدى. ەشقانداي قارار نەمەسە باسقا رەسمي قۇجاتتار جاسالمايدى. كەڭەستىڭ باسقا مۇشەلەرى، ەگەر قالاسا، وتىرىسقا قاتىسۋدان باس تارتا الادى.

بەلارۋستەگى جاعدايدى تالقىلاۋ وسى كەڭەستىڭ بيىلعى تۇراقتى ەمەس مۇشەسى ەستونيانىڭ باستاماسىمەن ءوتىپ جاتىر. كەزدەسۋدى ەستونيا سىرتقى ىستەر ءمينيسترى ۋرماس رەينسالۋ باسقارادى.

9 تامىزدا بەلارۋستە پرەزيدەنت سايلاۋى ءوتتى. ورتالىقسايلاۋ كوميسسياسى قازىرگى مەملەكەت باسشىسى الەكساندر لۋكاشەنكو 80,10% داۋىسپەن جەڭىسكە جەتكەنىن جاريالادى. ونىڭ باستى باسەكەلەسى، وپپوزيتسيا اتىنان قاتىسقان سۆەتلانا تيحانوۆسكايا 10,12% داۋىسقا يە بولدى.

تيحانوۆسكايا سايلاۋ قورىتىندىسى بويىنشا ورتالىق سايلاۋ كوميسسياسىنا شاعىم ءتۇسىردى. ەكزيت-پولدىڭ ناتيجەلەرى 9 تامىز كەشكە جاريالانعاننان كەيىن مينسكتىڭ ورتالىعىندا جانە رەسپۋبليكانىڭ كەيبىر باسقا قالالارىندا جاپپاي نارازىلىق باستالدى. شەرۋگە شىققانداردى قۇقىق قورعاۋ ورگاندارىنىڭ قىزمەتكەرلەرى سوققىعا جىعىپ، كوز جاساۋراتاتىن گاز قولدانعان. ىشكى ىستەر مينيسترلىگىنىڭ حابارلاۋىنشا، ميتينگتەر كەزىندە 6 مىڭعا جۋىق ادام ۇستالدى، ونداعان پوليتسيا قىزمەتكەرلەرى مەن دەمونسترانتتار جاراقات الدى.

"The Qazaq Times"