قازاقستان ۇكىمەتى 44 كۇن وتكەندە باق وكىلدەرىنىڭ تالاپ ەتۋىنەن كەيىن كوروناۆيرۋستىڭ جاناما اسەرىنەن قايتىس بولىپ، جالپى ستاتيستيكاعا ەنبەي قالعانداردىڭ سانى تۋرالى دەرەكتى جاڭارتتى.

استاناداعى ورتكوم قىزمەتىندە وتكەن بريفينگتە دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ 23 شىلدەدەن بەرى بەلگىسىز بولىپ كەلگەن، بويىنان ۆيرۋس تابىلعانىمەن، ىلەسپە-جاناما اۋرۋدان قايتىس بولعانداردىڭ سانى 237-گە ارتقانىن مالىمدەدى. سوڭعى مارتە بۇل دەرەك وسىدان 44 كۇن بۇرىن 319 بولعانى ايتىلعان. قازىرگى تاڭدا جالپى ەسەبى 556-عا جەتكەن.

«ءولىم-ءجىتىم جاعدايىنا ساراپتاما جاسايتىن ارنايى كوميسسيانىڭ قورىتىندىسىنا سايكەس 556 ادام جاناما نەمەسە ىلەسپە اۋرۋلاردىڭ كەسىرىنەن قايتىس بولدى»، – دەدى قوجاحمەتوۆ.

رەسمي ستاتيستيكاعا سايكەس، كوروناۆيرۋس پەن وعان ۇقساس پنەۆمونيانىڭ سالدارىنان 1 917 قازاقستاندىق (U07.1 - 1 612, U07.2 - 305) ومىردەن وتكەن. بۇدان وزگە 556 ادامدى قوسا ەسەپتەگەندە، ۆيرۋس جۇقتىرىپ قايتقانداردىڭ جيىنتىق سانى 2 473 بولادى. ال بيلىك مويىنداعان ناۋقاستاردىڭ جالپى ەسەبى 132 مىڭنان اسقان.

QT رەداكتسياسى كوپ ايتىلا بەرمەيتىن، سول سەبەپتى كولەڭكەدە قالىپ قوياتىن قۇربانداردىڭ دەرەگىن  پاندەميا باستالعالى بەرى دەنميننەن تۇراقتى تۇردە سۇراتىپ كەلەدى. دەگەنمەن مينيسترلىك ەشبىر تۇسىندىرمەسىز كەشىكتىرىپ نەمەسە جاۋاپسىز قالدىرىپ وتىرعان.

"The Qazaq Times"