ءۇندى-قىتاي شەكارا قايشىلىعى: ءۇندىستان ارمياسى قىتاي ارمياسىنا جاۋاپ بەردى

كەشە، 1 قىركۇيەك ءۇندىستان بيلىگى مالىمدەمە جاساپ، ءۇندىستان ارمياسى لاداكتىڭ شىعىسىنداعى داۋلى شەكارا ايماعىندا قىتايدىڭ تاياۋداعى «ارانداتۋشىلىق اسكەري ارەكەتتەرىنىڭ جولىن كەسكەنىن» مالىمدەدى. ءبىر اي بۇرىن اتالعان ايماقتا ءۇندىستان مەن قىتاي شەكاراشىلارى سوڭعى ەلۋ جىل ىشىندەگى ەڭ قاندى قاقتىعىسقا تۇسكەن ەدى.

ءۇندىستان قورعانىس مينيسترلىگىنىڭ مالىمدەۋىنشە، قىتاي حالىق-ازاتتىق ارمياسى سەنبىگە قاراعان ءتۇنى «شەكارا مارتەبەسىن وزگەرتۋ ماقساتىندا ارانداتۋشىلىق ارەكەتتەرگە بارعان». سونداي-اق، قىتاي شەكاراشىلارىن ەكى تاراپتىڭ ايماقتاعى قايشىلىقتى شەشۋ ءۇشىن تاراپتاردىڭ بۇدان بۇرىن قول قويعان «اسكەري جانە ديپلوماتيالىق كۇشتەرمەن جاسالعان كەلىسىمدى» بۇزدى دەپ ايىپتاعان.

ءۇندىستان ۇكىمەتىنىڭ مالىمدەمەسىنە قاراعاندا، ەكى ەلدىڭ جوعارى اسكەري قولباسشىلارى 31 تامىز كۇنى كەزدەسۋ وتكىزىپ، شەكارا جاعدايىن تالقىلاپ، قايشىلىقتى شەشۋدىڭ جولدارىن ىزدەگەن. «ءۇندىستان تارابى ديالوگقا دەگەن ۇمتىلىسىن تانىتۋمەن بىرگە شەكارالىق تۇتاستىعىن بەرىك قورعاۋ ۇستانىمىن دا انىق ساقتادى»، – دەلىنگەن ءۇندىستان قورعانىس مينيسترلىگى.

بەيجىڭدە قحر ءسىم وكىلى ەكى ەل وكىلدەرى شەكارا قايشىلىعى تۋراسىندا پىكىر الماسىپ جاتقانىن راستادى. بىراق، ول قىتاي شەكاراشىلارىنىڭ ارانداتۋشىلىق ارەكەتى تۋرالى مالىمەتتى تەرىسكە شىعاردى. «قىتاي اسكەري كۇشتەرى قىتاي-ءۇندىستان شەكارا سىزىعىن كەسىپ وتكەن جوق»، – دەپ كەسەتتى قىتاي ءسىم وكىلى جاۋ ليجيان. كەلىسسوز مازمۇنى تۋرالى اشىق مالىمەت تاراتقان جوق.

ەكى ەل شەكاراسىندا سەنبىگە قاراعان تۇندە ناقتى قانداي وقيعا بولىپ، قاي تاراپتىڭ قانداي ارەكەت ەتكەنى تۋرالى انىق مالىمەت جوق. بەيجىڭ مەن جاڭا-دەلي تەك ءوز تارابىنىڭ پوزيتسياسىن قورعاۋ ماقساتىندا ارەكەت ەتتىك دەگەن مالىمەتتەر ايتادى. دەگەنمەن، ءۇندى قورعانىس مينيسترلىگى ءبىر كۇننەن كەيىنگى مالىمدەمەسىندە: «ءۇندىستان قارۋلى كۇشتەرى قىتاي ارمياسىنىڭ پانگونگ كولىنىڭ وڭتۇستىك جاعالاۋىنداعى ءىس-ارەكەتتەرىن توقتاتۋ ماقساتىندا جانە ءوز پوزيتسياسىن ساقتاۋ ماقساتىندا شارالار قابىلدادى. ناتيجەسىندە قىتاي ارمياسىنىڭ ارانداتۋشىلىق ارەكەتتەرىن توقتاتتى»، – دەگەن.

“The Qazaq Times”