باتىس ەلدەرى مەن ءۇندى-تىنىق مۇحيتى ايماعىنداعى بىرقاتار ەلدەر جاڭا ناتو ۇيىمىن قۇردى دەسە دە بولادى. بۇلار قىتايدىڭ ايماقتاعى كۇن ساناپ ارتىپ كەلە جاتقان قاتەرىنە قارسى بىرىككەن ارەكەتتەر الىپ بارۋدا. الايدا، قىتايدا ءوز كەزەگىندە وڭىردەگى ستراتەگيالىق جۇرىستەرىن جيىلەتتى. بەيجىڭ مەن يسلاماباد اراسىنداعى قورعانىس جانە ەكونوميكالىق ىنتىماقتاستىق تەرەڭدەي تۇسۋدە.

وتكەن اپتا سوڭىندا قىتاي اسكەري ونەركاسىبى پاكىستاننىڭ تەڭىز كۇشتەرىنە ارناپ جاساعان اسكەري كەمەنى سۋعا سالدى. بۇل قىتايدىڭ پاكىستانعا جاساپ بەرۋگە ۋادە ەتكەن زاماناۋي وزىق اسكەري تەحنيكالارمەن جابدىقتالعان 4 اسكەري كەمەسىنىڭ العاشقىسى.

شانحايدا تەڭىزگە شىعارىلعان 054A / P فرەگاتى. فوتو; VOA.

پاكىستان اسكەري-تەڭىز كۇشتەرى جەكسەنبىدەگى مالىمدەمەسىندە: «قىتايدىڭ مەملەكەتتىك كاسىپورنى «حوۋ دوڭ جۇڭحۋا» كەمە جاساۋ زاۋىتىندا جاسالعان 054A / P ءتيپتى فرەگات شانحايدا سالتاناتتى تۇردە تەڭىزگە شىعارىلدى. وعان پاكىستان اسكەري-تەڭىز كۇشتەرىنىڭ جوعارى لاۋازىمدى تۇلعالارى قاتىستى»، – دەگەن. سونداي-اق: «بۇل كەمەلەر بىزگە قاراستى تەڭىز ايدىندارىنداعى بەيبىتشىلىك پەن قاۋىپسىزدىكتى ساقتاۋعا ۇلكەن سەپتىگىن تيگىزەدى»، – دەيدى پاكىستان اسكەري-تەڭىز كۇشتەرى مالىمدەمەسىندە.

مالىمەتكە قاراعاندا، بۇل كەمەلەر زاماناۋي جەر ءۇستى، سۋ استى جانە اۋە شابۋىلىنا قارسى قورعانىس تەحنيكالارىنا يە جەتىلدىرىلگەن فرەگاتتار. سۋعا سالىنعان جاڭا فرەگاتتىڭ جاسالۋ قۇنى تۋرالى مالىمەت جوق. دەگەنمەن، وسىعان ۇقساس اسكەري كەمەلەردى وندىرۋگە 350 ملن اقش دوللارىنان استام قارجى كەتەتىنىن مەجەلەۋگە بولادى.

قىتاي اسكەري ونەركاسىبى وندىرگەن 054A / P فەرگاتى. فوتو: شينلاڭ.

قىتاي وندىرگەن اسكەري كەمەنىڭ ىسكە قوسىلۋى قىتاي مەن پاكىستاننىڭ ورتاق قارسىلاسى سانالاتىن ۇندىستانمەن اراداعى شيەلەنىس كۇشەيىپ تۇرعان تۇسقا تۇس كەلدى. بۇنىڭ وسى بۇل وقيعانىڭ ساياسي، اسكەري ءمانىن تەرەڭدەتە ءتۇستى. پاكىستان تارابى قىتايدا جاسالىپ جاتقان كەمەلەر تولىقتاي پايدالانۋعا بەرىلگەننەن كەيىن پاكىستان اسكەري-تەڭىز فلوتىنىڭ ەڭ ءىرى جانە تەحنولوگيالىق جوعارى مۇمكىندىككە يە پلاتفورمالارىنىڭ بىرىنە اينالاتىنىن ايتۋدا. بۇل پاكىستان تەڭىز كۇشتەرىنىڭ قۋاتىن جوعارىلاتا تۇسپەك.

054A / P ءتيپتى فرەگاتتار قازىر قىتاي اسكەري-تەڭىز كۇشتەرىنىڭ نەگىزگى تىرەگى سانالادى. قىتاي تارابىنىڭ جوسپارى بويىنشا 2021 جىلى قالعان ءۇش اسكەري كەمە پاكىستانعا بەرىلەدى. قىتاي مەن پاكىستان بۇعان قوسا JF-17 كوپ فۋنكتسيالى يسترەبيتەلدەردى شىعارادى. بۇل ەكى ەل قورعانىس ىنتىماقتاستىعىنىڭ تىم تەرەڭ ەكەنىن تۇسىندىرەدى.

“The Qazaq Times”