كانادا پارلامەنتىنىڭ جۇمىسى توقتاتىلدى

كانادا پرەمەر-ءمينيسترى دجاستين تريۋدو پارلامەنت جۇمىسىن 23 قىركۇيەككە دەيىن توقتاتۋ تۋرالى شەشىم شىعاردى. مينيسترلەر كابينەتىنىڭ باسشىسى تريۋدو بۇل جارلىقتى ەلدىڭ گەنەرال-گۋبەرناتورى جيۋلي پەيەتكە جولدادى.

پارلامەنتتىك راسىمدەرگە سايكەس، پالاتالاردىڭ جۇمىسى توقتاتىلعان جاعدايدا، بۇرىن قاراۋعا ەنگىزىلگەن بارلىق زاڭ جوبالارى جويىلادى. ونىڭ ورنىنا جاڭا زاڭ، جوسپارلار قارالادى. تريۋدو مالىمدەمەسىندە: «كوروناۆيرۋس پاندەمياسىنان كەيىنگى ەكونوميكانى قالپىنا كەلتىرۋدىڭ ۇزاق مەرزىمدى جوسپارى قاجەت. بۇل جوسپاردى جۇزەگە اسىرۋدىڭ العاشقى قادامدارىن 23 قىركۇيەكتە ۇسىنامىز. بۇگىن گەنەرال-گۋبەرناتوردان پارلامەنتتىڭ جۇمىسىن توقتاتا تۇرۋدى ءوتىندىم. ەكونوميكاسى  جاڭا جوسپاردى قاجەت ەتەتىن بارلىق ۇكىمەت وسىنداي قادام جاسايدى»، – دەدى.

الداعى ۋاقىتتا تريۋدو پارلامەنت تاراپىنان سەنىم داۋىسىن الۋى كەرەك. ەگەر داۋىس جەتكىلىكسىز بولسا، كانادانى جاڭا سايلاۋ كۇتەدى. ەلدە 2005 جىلدىڭ قاراشاسىندا وسىنداي جاعداي بولعان: پارلامەنتتىڭ داۋىسىن جيناي الماعان ليبەرالدى پرەمەر-مينيستر پول مارتين وتستاۆكاعا كەتۋگە جانە 2006 جىلدىڭ قاڭتارىندا وتكەن جاڭا سايلاۋدى جاريالاۋعا ءماجبۇر بولدى.

سوڭعى كانادا پرەمەر-ءمينيسترى، 2006 جىلعى سايلاۋدا جەڭىسكە جەتكەن كونسەرۆاتور ستيۆەن حارپەر 2013 جىلدىڭ قىركۇيەگىندە «تاقتىڭ ءسوزى» ەرەجەسى بويىنشا پارلامەنتتىڭ جۇمىسىن ۋاقىتشا توقتاتۋ تۋرالى شەشىم قابىلداعان. بۇعان دەيىن تريۋدو حارپەردى ساياسي ايلا-امالدارمەن ايىپتاعان.

كەيبىر ساراپشىلاردىڭ پىكىرىنشە، دجاستين تريۋدو پارلامەنتتىڭ جۇمىسىن توقتاتۋ ارقىلى ءوزىنىڭ باسى داۋعا ىلىككەن «we Charity» قايىرىمدىلىق قورىنىڭ اينالاسىنداعى جەمقورلىق جانجالىن توقتاتقىسى كەلەدى. وسى مانەۆردىڭ ارقاسىندا سەناتتىڭ تەرگەۋ جۇرگىزەتىن قارجى كوميتەتىنىڭ قىزمەتى دە توقتاتىلادى.

"The Qazaq Times"