قىتايعا اسكەري قىسىم ارتا ءتۇستى: اقش تايۋانعا F-16V جويعىش ۇشاقتارىن ساتىپ بەردى

اقش تايۋانعا (تايۆان) F-16V جويعىش ۇشاقتارىنىڭ ەڭ جاڭا تۇرلەرىن ساتىپ بەرۋ كەلىسىمىنە قول قويدى. كەلىسىم-شارتقا ساي تايۋان اتالعان جويعىش ۇشاقتاردان 66 داناسىن ساتىپ الادى. ۇشاقتاردىڭ العاشقىلارى 2023 جىلى جەتكىزىلە باستايدى. 2026 جىلى كەلىسىم تولىق ورىندالماق.

امەريكالىق جانە تايۋاندىق ساراپشىلار بۇنى اسا ءماندى ساياسي قادام رەتىندە اتاۋدا. ياعني، قۇراما شتاتتار تايۋاننىڭ ءوزىن-ءوزى قورعاۋ قۋاتىن ارتتىرۋعا قولداۋ كورسەتۋىنىڭ جانە تايۋاننىڭ قاۋىپسىزدىگىن قورعاۋ تۋرالى ۋادەلەرىن ورىنداۋعا دايىن ەكەنىن كورسەتەتىن قادام رەتىندە اتايدى.

ايتسا ايتقانداي، اقش پەن تايۋان اراسىندا 1992 جىلدان بەرى قاراي بۇنداي ءىرى كولەمدە اسكەري تەحنيكا الماسۋى بولعان ەمەس. سول جىلى تايۋان قۇراما شتاتتاردا وندىرىلگەن F-16 ۇشاقتارىنان 150 داناسىن ساتىپ العان ەدى.

كەزەكتى اسكەري تەحنيكا ساۋداسى قۇراما شتاتتىڭ تايۋان ماسەلەسىندەگى سوڭعى شەشىمىن انىق كورسەتتى دەسە دە بولادى. دەگەنمەن، بۇل قادام ونسىزدا قىرعي-قاباق قارىم-قاتىناسقا بەت العان اقش پەن قىتاي اراسىن ودان ارمان الشاقتاتا تۇسپەك. سوعان ساي، تايۋان بۇعازىنداعى بولۋى ىقتيمال سوعىس قاتەرىن دە كۇشەيتەدى. بەيجىڭ تارابى تايۋاندى وزىنە تاۋەلدى پروۆينتسيا دەپ قارايتىندىقتان اقش-تىڭ ارەكەتىن ارانداتۋشىلىق دەپ باعالايتىنى ءسوزسسىز.

بۇعان قوسا، وزىق سوعىس تەحنيكالارىن تايۋانعا ساتىپ بەرۋ اقش پەن قىتاي اراسىنداعى قايشىلىقتىڭ قانشالىقتى اۋىر ەكەنىن دە كورسەتەدى. بەيجىڭ مەن ۋاشينگتون جاقىن قارىم-قاتىناستا تۇرعان ۋاقىتتاردا اقش تايۋانعا ۇلكەن كولەمدە اسكەري تەحنيكا ساتىپ بەرمەگەن. جانە ونداعان جىلدار بويى بەيجىڭنىڭ تايۋان تۋرالى ۇستانىمدارىنا جىلى جاۋاپ بەرىپ كەلگەن بولاتىن.

F-16V جاڭا تۇرلدەگى سوعىس ۇشاقتارىنىڭ تايۋانعا بەرىلۋى قىتايدىڭ اۋە جانە تەڭىز قورعانىس كۇشتەرىنە جاڭا سىناقتار الىپ كەلەتىنىن ەسكەرۋ كەرەك. ارينە، قىتاي اۋە جانە تەڭىز كۇشتەرىنىڭ قۋاتى تايۋاننان ارتىق بولعانىمەن، امەريكالىق جاڭا سوعىس تەحنيكالارىنان كەيىن قىتايدىڭ قورعانىس سالاسىن تاعى دا بەكەمدەي تۇسۋگە قارجى اۋدارۋىنا تۋرا كەلەدى. بۇل قىتايدىڭ اسكەري شىعىندارىن كوبەيتە تۇسپەك.

“The Qazaq Times”