فوتو: https://cdni

بەلارۋس ۇكىمەتى  وتستاۆكاعا كەتتى. بۇل تۋرالى ۇلتتىق قۇقىقتىق ينتەرنەت پورتالدا جاريالاندى.

رەسمي حابارلامادا: «بەلارۋس كونستيتۋتسياسىنىڭ 106-بابى، «بەلارۋس رەسپۋبليكاسىنىڭ مينيسترلەر كەڭەسى تۋرالى» 2008 جىلعى 23 شىلدەدەگى № 424-ز زاڭىنىڭ 9-بابى بويىنشا بەلارۋس ۇكىمەتى وكىلەتتىلىگىن توقتاتتى»، – دەلىنگەن.

9 تامىزدا بەلارۋستە پرەزيدەنتتىك سايلاۋ ءوتتى. رەسمي مالىمەتكە سايكەس، پرەزيدەنت سايلاۋىنىڭ الدىن الا قورىتىندىسى بويىنشا، قازىرگى باسشى الەكساندر لۋكاشەنكوعا سايلاۋشىلاردىڭ 80%-ى داۋىس بەرگەن، ونىڭ باستى قارسىلاسى سۆەتلانا تيحانوۆسكايا 10% داۋىس العان. نارازىلار سايلاۋ ناتيجەسى بۇرمالاندى دەپ ەسەپتەيدى. سايلاۋدان كەيىن ەلدە جاپپاي نارازىلىق ورىن الىپ، ەۋرووداق پەن امەريكا شيرەك عاسىر بيلىك ەتكەن لۋكاشەنكونىڭ جەڭىسىن مويىنداۋدان باس تارتتى. سونىمەن قاتار ەو قۇرامىنداعى 27 مەملەكەت بەلارۋسكە سانكتسيا ەنگىزۋ ماسەلەسىن قاراستىردى. لۋكاشەنكونى «ايقىن جەڭىسىمەن» قۇتتىقتاعان ەلدەر قاتارىندا قىتاي، رەسەي، قازاقستان، وزبەكستان، تاجىكستان بار.

بەلارۋستە سايلاۋعا دەيىن مەرزىمىنەن بۇرىن داۋىس بەرۋ ءوتتى. مۇنداي نورما ەل زاڭىمەن قاراستىرىلعان، بىراق قۇقىق قورعاۋشىلار مەن حالىقارالىق باقىلاۋشىلار بۇل ءادىستى قاتاڭ سىنعا الدى. ولاردىڭ پىكىرىنشە، ۇكىمەت داۋىس بەرۋ ناتيجەلەرىن قولدان جاساۋ ءتاسىلىن پايدالانعان.

11 تامىزدا تيحانوۆسكايا ليتۆاعا باس ساۋعالاپ كەتكەننەن كەيىن ەكى رەت بەينە-ۇندەۋ جاريالادى. بىرىندە ول بالالارىنىڭ قاۋىپسىزدىگىنە الاڭداۋى، لاجسىزدىق سەبەبىنەن كەتكەنىن ايتقان. ەكىنشىسىندە ورتالىق سايلاۋ كوميسسياسىنىڭ جەتەكشىسى ليديا ەرموشينانىڭ كابينەتىندە قىسىم جاسالعاندىقتان، قاعازعا قاراپ وتىرىپ جاقتاستارىن نارازىلىق اكتسياسىنا قاتىسپاۋعا شاقىرعان.

كەشە نارازىلىق دەكاداسىنىڭ سوڭىنا قاراي تيحانوۆسكايا حالىق ليدەرى بولۋعا دايىن ەكەنىن ايتتى.

"The Qazaq Times"