تيحانوۆسكايانىڭ ءتورتىنشى ۇندەۋى – «ۇلت كوشباسشىسى»

دۇيسەنبى، نارازىلىق دەكاداسىنىڭ سوڭىنا قاراي تيحانوۆسكايا حالىق ليدەرى بولۋعا دايىن ەكەنىن مالىمدەدى.

بەلارۋستى شيرەك عاسىر بيلەگەن الەكساندرا لۋكاشەنكونىڭ ساياسي سۆەتلانا تيحانوۆسكايا جاڭا بەينەۇندەۋ جاسادى. ول 9 تامىزدا وتكەن سايلاۋدان كەيىن مينسكتەن ليتۆاعا كەتۋگە ءماجبۇر بولعان. وپپوزيتسيا تاراپىنىڭ بىرىككەن كانديداتى جاڭا سايلاۋعا دەيىن ۇلت ليدەرى بولۋعا نيەتتى ءارى دايىن ەكەنىن جەتكىزدى.

ول «مەنىڭ سۇيىكتى دە قىمباتتى بەلارۋ جۇرتىم!   قازىر بارلىعىمىز، تۇتاس ەلىمىز قاتىگەزدىك ەرلىككە، ۇمىتسىزدىك باتىلدىققا، ماحاببات ساتقىندىققا اينالعان تاريحتاعى ەڭ قيىن شاقتى باستان كەشىرىپ وتىرمىز»، –  دەپ باستادى ءسوزىن.

سونداي-اق، جاقتاسى كوپ تيحانوۆسكايا ەل نارازىلىق كەزىندە قايتىس بولعان قاھارماندارىن قارا جەرگە ارۋلاپ تاپسىرعانىن ايتادى. جەرلەۋدە دەپ ايتادى. «مەنىڭ دە سىزدەرمەن بىرگە قابىرعام قايىسىپ، قاتىگەزدىككە قان جىلادىم»، – دەگەن ول  قۇربان بولعانداردىڭ وتباسىلارىنا قولداۋ كورسەتىپ قانا قويماي، ولاردىڭ قۇرمەتىنە كوشەلەرگە اتاۋ بەرۋدى ۇسىندى.

وسىدان كەيىن تيحانوۆسكايا ءوزىنىڭ ۇلت كوشباسشىسى بولۋعا نە يتەرمەلەيتىنى تۋرالى اعىنان جارىلا سويلەدى:

– ماعان ساياساتقا ارالاسىپ، ساياسي مانساپ قۇرام دەگەن وي ءۇش ۇيىقتاسام تۇسىمە دە كىرىپ-شىقپاعان. ساياساتكەر بولۋدى قالاعان دا ەمەسپىن. بىراق ادامنىڭ دەگەنى ەمەس، تاعدىردىڭ ىسىمەن وزبىرلىق پەن ادىلەتسىزدىككە قارسى العاشقى شەپتە تۇرۋعا تۋرا كەلدى. تاعدىر جانە سىزدەر. سىزدەر ماعان سەنىپ قانا قويماي، كۇش-جىگەر بەردىڭىزدەر. تۋعان حالقىمنىڭ باتىلدىعىن ماقتان تۇتامىن!...

«سىزدەر ماعان داۋىس بەردىڭىزدەر... مەن مۇنى نە ءۇشىن جاساعانىڭىزدى جاقسى بىلەمىن. ءبىز 26 جىل بۇرىن تۇسكەن شەت-شەگى جوق قۇرىقتان شىققىمىز كەلەدى»، – دەپ ويىن جالعادى. «ءبىر جاعىنان ەلدەگى دۇربەلەڭ باسىلىپ، قالىپتى جاعدايعا ورالۋى ءۇشىن مەن موينىما جاۋاپكەرشىلىك الىپ، بۇگىنگى تاڭدا ۇلت كوشباسشىسى رەتىندە ىسكە كىرىسۋگە دايىنمىن», – دەگەن كونتر-كانديدات ۇستانىمىن نىقتاي ايتتى.

سونىمەن بىرگە، بارلىق ساياسي تۇتقىنداردى مەيىلىنشە تەزىرەك بوساتۋعا ارنالعان زاڭ جوبالارىنىڭ توپتاماسىن ازىرلەگەنىن، جاڭا پرەزيدەنت سايلاۋىن وتكىزۋدىڭ تالاپتارىن دايارلاعانىن حابارلادى.

الداعى ۋاقىتتا «جەمقورلىق پەن زورلىق-زومبىلىققا يەك ارتىپ ۇيرەنگەن» ءامىرشىل-قىسپاقشىل جۇيەدەن جاسامپازدىق پەن ىزگىلىك وركەن جايعان ەلگە وزگەرۋى كەرەكتىگى تۋرالى ماقساتىن ءسوز ەتتى.

سەيسەنبى، 11 تامىزدا تيحانوۆسكايا ليتۆاعا باس ساۋعالاپ كەتكەننەن كەيىن ەكى رەت بەينە-ۇندەۋ جاريالادى. بىرىندە ول بالالارىنىڭ قاۋىپسىزدىگىنە الاڭداۋى، لاجسىزدىق سەبەبىنەن كەتكەنىن ايتقان. ەكىنشىسىندە ورتالىق سايلاۋ كوميسسياسىنىڭ جەتەكشىسى ليديا ەرموشينانىڭ كابينەتىندە قىسىم جاسالعاندىقتان، قاعازعا قاراپ وتىرىپ جاقتاستارىن نارازىلىق اكتسياسىنا قاتىسپاۋعا شاقىرعان.

وتكەن جۇمادا تيحانوۆسكايا تاعى ءبىر بەينە حابارلاما جاسادى. ول بەلارۋسسيا كوشەلەرىندەگى زورلىق-زومبىلىقتى توقتاتۋعا جانە بارلىق قالانىڭ اكىمدەرىن تامىزدىڭ 15-16 كۇندەرى وتكەن بەيبىت جيىنداردا باس ۇيىمداستىرۋشى بولۋعا شاقىرعان.

ناتيجەسىندە مينسك جانە باسقا دا 28 قالادا «ازاتتىق ءۇشىن!»  (16 تامىز وتكەن ەڭ ءىرى شەرۋدىڭ حرونيكاسىن وقىڭىز – QT) دەگەن اتاۋمەن جالپىۇلتتىق شەرۋ وتكەن. بەلارۋس تاريحىنداعى ەڭ ۇلكەن ميتينگ مينسك ورتالىعىندا 200 مىڭنان استام ادامنىڭ قاتىسۋىمەن ءوتتى. دەكاداعا جالعاسىپ جاتقان بيلىككە قارسى ەرەۋىلدىڭ نەگىزگى ءۇش تالابى – لۋكوشەنكونىڭ وتستاۆكاسى، ساياسي تۇتقىنداردىڭ ءبارىن بوساتۋ، نارازىلىق كەزىندە كۇش قولدانعان پوليتسيانى ءادىل سوتپەن جاۋاپقا تارتۋ.

"The Qazaq Times"