قىرعىزستانداعى ءساۋىر رەۆوليۋتسياسىنا قازاقستاننىڭ قانداي قاتىسى بار؟

بۇگىن قىرعىزستانداعى ءساۋىر رەۆوليۋتسياسىنا 7 جىل. وسىدان 7 جىل بۇرىن 7 ساۋىردە بۇرىنعى قىرعىز پرەزيدەنتى قۇرمانبەك باكيەۆكە قارسى حالىق جاپپاي ەرەۋىلگە شىعىپ، بىشكەكتىڭ الا-توو الاڭى قانعا بويالعان بولاتىن.

وسىعان وراي بۇگىن قىرعىزستان پرەزيدەنتىنىڭ سايتى المازبەك اتامباەۆتىڭ قىرعىز حالقىنا ۇندەۋىن جاريالادى. ۇندەۋدە: «2010 جىلدىڭ 7 ءساۋىرى قىرعىز حالقى ءۇشىن وتە ماڭىزدى كۇندەردىڭ ءبىرى. ويتكەنى ءدال وسى كۇنى ءبىز ەلىمىزدى ەكونوميكالىق جانە رۋحاني قۇلدىراۋدان امان الىپ قالدىق» دەلىنگەن.

ەستەرىڭىزدە بولسا،  وسىدان ءبىراز ۋاقىت بۇرىن قىرعىزستان پرەزيدەنتى المازبەك اتامباەۆ  "Euronews"  ارناسىنا بەرگەن سۇحباتىندا رەسمي اقوردانى بىلاي دەپ ايىپتاعان بولاتىن.  «2010 جىلىعى رەۆوليۋتسيا كەزىندە قازاقستانىڭ شەكاراسىن جاۋىپ تاستاۋى سالدارىنان ءبىزدىڭ ەلدە ادام  شىعىنىنا دەيىن بولدى. ەگەر ءبىز ەۋرازيالىق ەكونوميكالىق وداققا كىرمەسەك، بىزگە تاعى وسىعان ۇقساس قىسىم جاسالۋى مۇمكىن». اتامباەۆتىڭ بۇل ءسوزى، ەكى ەل اراسىنداعى الدە ءبىر سىرت كوزدەن تاسا قاراما-قايشىلىقتىڭ بار ەكەندىگىن بايقاتقانداي بولدى. ولاي ويلاۋدىڭ سەبەبى دە جوق ەمەس، ويتكەنى  ءساۋىر رەۆوليۋتسياسى كەزىندە قىرعىزستاندا ەرەۋىلشىلەردى كۇشپەن تاراتپاقشى بولعان سول كەزدەگى قىرعىز پرەزيدەنتى قۇرمانبەك باكيەۆتى ، قازاقستاننىڭ ارنايى جاساعى تىكەلەي ەلباسى نۇرسۇلتان نازارباەۆتىڭ تاپسىرماسىمەن تاراز قالاسىنا جەتكىزىپ، امان الىپ قالعان بولاتىن. ال ول كەزدە المازبەك اتامباەۆ باريكادانىڭ ار جاعىندا، ياعني روزا وتىنباەۆا باستاعان قىرعىز وپپوزيتسياسىنىڭ جاعىندا بولاتىن. نە دە بولسا، 2010 جىلى بىشكەكتەگى ءساۋىر رەۆوليۋتسياسى قىرعىزستان حالقىنىڭ عانا ەمەس قازاق ەلىنىڭ تاريحىنا دا ەنەتىن بولدى. ويتكەنى، بۇعان دەيىن ەش ءبىر ەل قازاقستاندى ادام ولىمىنە سەبەپشى بولدى دەپ ايىپتاماعان.

“The Qazaq Times”