كورنەكى وڭدەلگەن كوللاج. اقوردانىڭ قاسبەتى. فوتو: الەۋمەتتىك جەلىلەردەن

6 شىلدەدە – استانا كۇنىنە وراي ەلوردا اكىمدىگى قالانىڭ ءۇش جەرىندە وتشاشۋ جاساعانىن قوعام قاتتى سىناعان ەدى. پاندەميا وتىندە، كوروناۆيرۋس جانە كوۆيدتىك پنەۆمونيا ورشىگەن ء(دارى-دارمەك، دارىگەرلەر، اۋرۋحانادا ورىن جەتىسپەي، قازاناما كوبەيگەن)  تۇستا ەكس-پرەزيدەنت نۇرسۇلتان نازارباەۆتىڭ 80 جاس مەرەيتويىمەن قاتار استانا كۇنى دە تويلانباي قويمادى. ونلاين فورماتتا كوڭىل كوتەرۋگە ارنالعان ءىس-شارالار وتكىزىلگەن. بۇل قوعام تاراپىنان وتكىر سىنعا ۇشىراعانى بەلگىلى. اتىشۋلى وتشاشۋعا كىم قانشا قاراجاتپەن قولداۋ كورسەتكەن؟ 

الەۋمەتتىك جەلىلەردە فەيەرۆەرككە قارسى نارازىلىق كوڭىل-كۇي ارتقاننان كەيىن دە  7 شىلدە ەلوردا اكىمى وتكىزگەن ورتكوم (ورتالىق كوممۋنيكاتسيالار قىزمەتى) بريفينگىندە  تىلشىلەردىڭ سۇراعى قويىلماي قالعان.

سول كۇنى قالانىڭ مادەنيەت باسقارماسى Instagram جەلىسىندەگى رەسمي پاراقشاسىندا  «استانا كۇنىنە وتشاشۋ جىل باسىندا جوسپارلانعان بولاتىن، دەمەۋشىلەر ماتەريالدار ساتىپ الىپ، ورىنداردى انىقتادى. بۇل فەيەرۆەرك قالا تۇرعىندارىنىڭ كوڭىل-كۇيىن كوتەرۋگە، كوروناۆيرۋسپەن كۇرەستە الدىڭعى قاتاردا تۇرعان مەديتسينا قىزمەتكەرلەرىن قولداۋعا ارنالعان» دەگەن جاۋاپ مانىندەگى جازبا جاريالاعان.

ارادا ەكى جارىم اپتا وتكەن سوڭ بيلىك پەن ونىڭ وكىلدەرىنىڭ ارەكەتىنە تۇسىندىرمە جۇرگىزەتىن ادەتىمەن تانىلعان پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ ءوزىنىڭ Facebook جەلىسىندەگى پاراقشاسىندا وتشاشۋ جونىندە «قيىن جاعدايدا ادامداردىڭ رۋحىن كوتەرمەك بولدىق. بىراق بۇل ءدارىنىڭ اۋرۋدان دا جامان بولاتىنىنداي اسەر قالدىردى» دەپ جازدى. دەگەنمەن ەكس-ءمينيستردىڭ پىكىرى قازىر قولجەتىمسىز بولىپ تۇر.

استانانىڭ مادەنيەت باسقارماسى رەداكتسيا سۇراعىنا بىلاي جاۋاپ بەردى:

– 2020 جىلدىڭ 6 شىلدەسىندە وتكىزىلگەن وتشاشۋلاردىڭ دەمەۋشىلەرى جەكە بيزنەستىڭ وكىلدەرى بولىپ تابىلادى. وزدەرىن  جاريا قىلماۋ قۇقىعىن ەسكەرگەندىكتەن،  ...ەسىمدەرى مەن دەمەۋشىلىك كومەك مولشەرى اتالمايدى. دەمەۋشىلەر – استانالىق بيزنەس وكىلدەرى.

استانا اكىمى التاي كولگىنوۆتىڭ ءباسپاسوز حاتشىسى، قالا اكىمدىگى ءباسپاسوز قىزمەتىنىڭ جەتەكشىسى اقمارال ولجاباەۆانىڭ ايتۋىنشا، 6 شىلدە كۇنگى وتشاشۋعا بيۋدجەتتەن ءبىر تيىن دا جۇمسالماعان، تەك 3 دەمەۋشى جالپى جيىنى 25 ملن تەڭگە قارجى بولگەن.

وسىلايشا «جانازاداعى جىن ويناق» اتالىپ كەتكەن اتىشۋلى وتشاشۋدىڭ شىعىنىنا 600-گە تارتا تابىسىنان ايىرىلعان استانالىققا 42,5 مىڭ تەڭگە جاردەماقى بەرۋگە بولادى. دەمەۋشىلەر اتىن اتاماۋىنىڭ سەبەبى «بەلگىسىز قالعىسى كەلەدى» ەكەن. مۇندايدى شىن مۇقتاجعا قول ۇشىن سوزعاندا، جۋان جومارتتىق جاساعاندا بولۋشى ەدى.

رەداكتسيانىڭ «استانا اكىمدىگى «تۇرعىنداردىڭ كوڭىل-كۇيىن كوتەرۋگە، كوروناۆيرۋسپەن كۇرەستە  الدىڭعى قاتاردا تۇرعان مەديتسينا قىزمەتكەرلەرىن قولداۋعا» (7 شىلدەدەگى مالىمدەمەسىنەن – QT)  ارنالعان وتشاشۋدى قوعام نارازىلىعىنان كەيىن قاتە شەشىم بولدى دەپ ساناي ما؟» دەگەن ساۋالىنا:

«اكىمدىك كوروناۆيرۋسپەن كۇرەسۋدە الدىڭعى قاتاردا تۇرعان مەديتسينا قىزمەتكەرلەرىن قولداۋ جانە ازاماتتاردىڭ رۋحىن كوتەرۋ ماقساتىندا نۇر-سۇلتان قالاسىنداعى وتشاشۋلار وتكىزىلدى دەگەن ۇستانىمدى ۇستانادى»، – دەپ جاۋاپ بەردى.

ەكس-مينيستر اباەۆ «وتتى ءدارىنىڭ» اۋرۋدان اۋىر ەكەنىن مويىنداسا، استانا ءوز ارەكەتىن قاتە سانامايدى. قوعامنىڭ كوپ بولىگى «ورىنسىز توي» دەپ ەسەپتەيتىن، مەرەكە مەن مەرەيتوي توعىسقان كۇنگى وتشاشۋعا اتسالىسقان دەمەۋشىلەردىڭ شىن اتى تۋعان كۇن يەسىنە عانا ءمالىم بولسا كەرەك.

P.S.: ايتپاقتاي، استانا اكىمىنىڭ ءباسپاسوز حاتشىسى اقمارال ولجاباەۆا ەكى اپتا بۇرىن جولدانعان حاتقا جاۋاپتى باسشىلىقتىڭ ءالى قول قويىپ ۇلگەرمەگەنىن ايتىپ، جوعارىدا كورسەتىلگەن دەرەكتى جاريالاۋعا رۇقسات ەتتى. دۇيسەنبى كۇنى ءدال وسى مالىمەتتى رەسمي ۇلگىدەگى جاۋاپ حات تۇرىندە جولداۋعا ۋادەسىن بەردى.

"The Qazaq Times"