بىرىككەن اراب امىرلىگى مارسقا زىمىران ۇشىردى

بىرىككەن اراب امىرلىكتەرى مارسقا العاشقى زىمىرانىن ۇشىردى.

«ءال-امال»(«ءۇمىت») اتتى عارىش كەمەسى جاپونيانىڭ تانەگاشيما عارىش ورتالىعىنان بۇگىن تاڭعى ساعات 6: 58-دە ۇشىرىلدى. مارسقا جول تارتقان بۇل اۋە كەمەسى كەڭىستىكتە 7 اي ۋاقىت ۇشادى.

نەگىزىندە ەل بيلىگى زىمىراندى 14 شىلدەدە ۇشىرۋدى جوسپارلاعان، الايدا اۋا-رايىنىڭ تۋىنداتقان قولايسىزدىعىنا بايلانىستى ەكى مارتە كەيىنگە شەگەرىلدى.

عارىش كەمەسىنىڭ مارستى زەرتتەۋ بويىنشا 8 ميسسياسى بار: ولاردىڭ كەيبىرەۋلەرى مارس وربيتاسىندا بولسا، باسقالارى مارستىڭ بەتىنە قونالى. وسى جىلى مارسقا زىمىران ۇشىرۋدى اقش پەن قىتاي دا جوسپارلاپ وتىر.

ءباا عىلىم ءمينيسترى سارا ءاميريدىڭ ايتۋىنشا، مارسقا ارنالعان جوبا قۇنى – 200 ميلليون دوللار. جوبا ماقساتى – العاش رەت مارس اتموسفەراسىنىڭ تولىق بەينەسىن كورسەتۋ. سونىمەن قاتار كۇندەلىكتى جانە ماۋسىمدىق وزگەرىستەرىن زەرتتەۋ.

ءباا العاش رەت 2014 جىلى وسى جوبانى تانىستىرعان بولاتىن. ال عارىش سالاسىن دامىتۋ ءۇشىن 2017 جىلى ۇلتتىق عارىش باعدارلاماسىن باستادى.

2117 جىلعا دەيىن ءباا تۇرعىندارىنىڭ مارسقا قونىس اۋدارۋ جوسپارى بار. وتكەن جىلدىڭ قىركۇيەگىندە حاززا مانسۋري حالىقارالىق عارىش ستانتسياسىنا ۇشىپ، عارىشقا ۇشقان العاشقى اراب بولدى.

«ءال-امال» زىمىرانىن جاساۋ جانە قۇراستىرۋ ءۇشىن دۋبايداعى مۇحاممەد بين راشيد عارىش ورتالىعى (MBRSC) امەريكالىق وقۋ ورىندارىمەن ىنتىماقتاستىق كەلىسىم جاساستى. دۋبايداعى MBRSC عارىش ورتالىعى ۇشىرلعان «ءال-امال» زمرانىن قاشىقتىقتان باسقارادى.

"The Qazaq Times"