دۇنيەجۇزىلىك دەنساۋلىق ساقتاۋ ۇيىمى Covid-19 ۆيرۋسىنىڭ باستاۋ كوزىن زەرتتەۋ ءۇشىن قىتايعا جىبەرگەن ەكى زەرتتەۋشىسى بەيجىڭگە جەتتى. اقش جانە بىرقاتار الەم ەلدەرى قاۋىپتى ۆيرۋستىڭ جاھاندىق ىندەتكە اينالۋىنا قىتاي ۇكىمەتىنىڭ جاۋاپكەرشىلىگى بار دەپ سانايدى. سوندىقتان دا، حالىقارالىق زەرتتەۋشى مامانداردىڭ قىتايعا بارۋىن بەيجىڭ بيلىگى جىلى قابىلداي قويمايدى.

گونكونگتاعى South China Morning Post باسىلىمىنىڭ حابارلاۋىنشا، بەيجىڭ جاق ددۇ زەرتتەۋشىلەرىنىڭ قىتايعا كەلۋى تۋرالى ەشقانداي مالىمدەمە تاراتپاعان. رەسمي باق تا ءۇنسىز قالعان. قىتاي ۇكىمەتى ەكى ساراپشىنىڭ اتى-ءجونى، جۇمىس ساپارلارى جانە زەرتتەۋ باعىتى تۋرالى ناقتى اقپارات بەرمەگەن.
حالىقارالىق ساراپشىلاردىڭ بەيجىڭگە سەنبى جانە جەكسەنبى كۇندەرى بارعانىن Associated Press اگەنتتىگى عانا حابارلاعان. قىتاي ءسىم وكىلى زەرتتەۋشىلەردىڭ قىتايعا بارعانى تۋرالى اقپاراتتى كەشە عانا راستادى.

جاھاندىق ىندەتكە اينالعان ۆيرۋستىڭ قىتايدىڭ ۋحان قالاسىندا پايدا بولعانى بۇكىل الەمگە بەلگىلى. اقش ، اۋستراليا ت.ب كوپتەگەن ەلدەر حالىقارالىق قاۋىمداستىقتى ۋحاندا حالىقارالىق تاۋەلسىز زەرتتەۋلەر جۇرگىزۋگە شاقىرۋدا. الايدا، قىتاي بۇل تالاپتان اشىق باس تارتىپ وتىر.

حالىقارالىق باق-تىڭ حابارلاۋىنشا، ەكى ماماننىڭ قىتايعا بارۋداعى ميسسياسى قىتايدىڭ دەنساۋلىق ساقتاۋ سالاسىنىڭ باسشىلارىمەن جانە عالىمدارىمەن بىرلەسە جۇمىس جاساۋ، الداعى ۋاقىتتا ددۇ الەمگە ءحاۋىپ الىپ كەلگەن ۆيرۋس جايلى قىتايدا تەرگەۋ جۇرگىزۋ ءۇشىن حالىقارالىق ارنايى توپ قۇرماقشى. ال ەكى زەرتتەۋشىنىڭ قىتايعا بارۋى تەرگەۋدىڭ باستاپقى شارالارى بولماق.

الايدا اقش وتكەن اپتادا ددۇ-دان شىعاتىنىن مالىمدەدى، بۇل ددۇ-نىڭ قىتايمەن وسى زەرتتەۋ بويىنشا كەلىسسوزدەر جۇرگىزۋدەگى باسىمدىلىق السىرەتتى. امەريكا قۇراما شتاتتارى ددۇ-نىڭ ەڭ ءىرى قولداۋشىسى بولىپ تابىلادى، جىل سايىن ددۇ-نا شامامەن 450 ميلليون دوللار اقشامەن قارجىلاندىرادى.

"The Qazaq Times"