قازاقستاندا كارانتين شارالارى شىلدەنىڭ سوڭىنا دەيىن جالعاسادى. ۇكىمەتتىك كوميسسيا 14 شىلدەدە شەشىم قابىلدايدى.

كارانتين كەزىندە تابىسسىز قالعاندارعا 42 500 تەڭگە تولەنەدى. بۇل جونىندە پرەزيدەنت توقاەۆ: «قازىر جاعدايدىڭ رەتتەلە باستاعانىنىڭ العاشقى نىشاندارى بايقالادى. احۋالدى تولىق تۇراقتاندىرۋ ءۇشىن الداعى ەكى اپتانىڭ ماڭىزى زور. مۇقتاج جاندارعا ۇكىمەت شىلدەگە 42,5 مىڭ تەڭگە تولەيدى»، – دەدى.

مۇنىمەن قاتار، قاسىم-جومارت توقاەۆ ءوزىنىڭ Twitter پاراقشاسىندا: «ەلىمىزدەگى ەپيدەميولوگيالىق احۋالعا بايلانىستى كارانتين رەجيمى تاعى ەكى اپتاعا سوزىلىپ، شىلدەنىڭ سوڭىنا دەيىن جالعاسادى. ەرتەڭ ۇكىمەتتىك كوميسسيا شەشىم قابىلدايدى. ازاماتتارىمىز دەنساۋلىعىن ساقتاۋ ءۇشىن كارانتيننىڭ نەگىزگى تالابى ءوزىن-ءوزى وقشاۋلاۋ شاراسىن قاتاڭ ۇستانۋى قاجەت»، – دەپ جازدى.

2 شىلدە مەملەكەتتىك كوميسسيا وتىرىسىندا قازاقستانداعى ەپيدەميولوگيالىق احۋالدى تۇراقتاندىرۋ شارالارى قارالىپ، ەلدە 14 كۇنگە كارانتين شەكتەۋلەرى ەنگىزىلگەن. سول كۇنى قازىرگى دەنساۋلىق ساقتاۋ ءمينيسترى الەكسەي تسوي ەلدە COVID-19 دەرتىنەن قايتىس بولعاندار سانى اپتاسىنا ءبىر رەت جاريالانادى دەپ مالىمدەدى.

قازاقستاندا پاندەميا باستالعالى بەرى 60 مىڭعا جۋىق ادام COVID-19 ىندەتىن جۇقتىردى، 34 مىڭنان استام ادام ساۋىعىپ شىقتى. 375 ناۋقاس قايتىس بولدى. كوروناۆيرۋسپەن قاتار ەلدە پنەۆمونيا ءورشىپ تۇر. 2020 جىلدىڭ العاشقى التى ايىندا 98 546 ادام پنەۆمونياعا شالدىققان. وسى جىلى ماۋسىمدا قازاقستاندا 628 ادام پنەۆمونيادان كوز جۇمعان.

"The Qazaq Times"