ءبىرتانوۆ پەن تسويدىڭ سوزىندەگى قايشىلىق – جەر جۇتقان جۇزدەگەن اپپارات

بۇرىنعى جانە كەيىنگى مينيسترلەردىڭ مالىمدەمەسىندەگى قايشىلىق. مەديتسينا سالاسىندا باعاسى قىمبات وكپەنى جاساندى جەلدەتۋ اپپاراتىنىڭ سانىنا قاتىستى داۋعا كىم جاۋاپتى؟ جۇزدەگەن قۇرىلعى بىرنەشە ايدا قايدا كەتتى؟

30 ناۋرىز كۇنگى بريفينگتە سول كەزدەگى دەنساۋلىق ساقتاۋ ءمينيسترى ەلجان ءبىرتانوۆ جەدەل جاردەمدە، اۋداندىق اۋرۋحانالاردا، ءىرى مەديتسينا ۇيىمدارىندا وكپەنى جاساندى جەلدەتەتىن 3 مىڭعا جۋىق (يۆل – ورىسشا) اپپارات بار ەكەنىن مالىمدەگەن. مۇنىڭ 167-ءسى جۇقپالى اۋرۋلار ەمحانالارىندا ورنالاسقان دەگەن.

سونداي-اق ۆەدومستۆو باسشىسى ءبىرتانوۆ قۇرىلعى تاپشىلىعىن جويۋ ماقساتىندا تەندەر وتكىزىلگەنىن جانە ءساۋىر ايىندا ءدال وسىنداي 270 اپپارات ساتىپ الىناتىنىن حابارلاعان.

سونىمەن قوسا دەمەۋشىلەردىڭ كومەگىمەن ساتىپ الىنعان وتاندىق 180 جىلجىمالى اپپارات تا جەتكىزىلەتىنىن ايتقان. بۇدان وزگە پاندەميا باستالعالى بەرى قايرات ساتىبالدى، ايدىن راحىمباەۆ، بولات وتەمۇراتوۆ قاتارلى وليگارحتار مەن باي-ماناپتار، قىتايلىق تانىمال كاسىپكەر دجەك ما 30 قۇرىلعى الىپ بەرگەن ەدى.

جالپى جيىنى 3300-دەن استام بارىن ەسەپتەۋگە بولادى. بىراق جاقىندا عانا مينيستر بولىپ تاعايىندالعان الەكسەي تسوي بۇگىنگى ورتالىق كوممۋنيكاتسيا قىزمەتىندە وتكىزگەن بريفينگتە باسقاشا مالىمەت ايتتى. ول:

–  قازىرگى تاڭدا قازاقستاندا 3294 دانا جاساندى تىنىستاۋ اپپاراتى بار، ونىڭ 978-ءى وتكەن ايدا ساتىپ الىندى. الداعى ۋاقىتتا تاعى مىڭ دانا قۇرىلعى ساتىپ الىنباق، – دەپ حابارلادى.

ءمينيستردىڭ سوزىنە سەنسەك، وتكەن ايدا نەبارى 2,3 مىڭداي عانا جاساندى تىنىستاۋ اپپاراتى بولعان. سوندا كوكتەمدە بار دەپ ايتىلعان 3 مىڭنان استام قۇرىلعى قايدا كەتكەن نەمەسە ىستەن شىعىپ، جارامسىز بولىپ قالعانى قانداي ەسەپكە الىنادى دەگەن سۇراق تۋادى. 3,5 مىڭ  ادامنان ۆيرۋس تابىلعان ناۋرىز ايىنىڭ سوڭى مەن ەندىگى 40 مىڭعا جۋىقتاعان قازىرگى تاڭدا اراسى بار بولعانى ءۇش اي. وسى ۋاقىت ارالىعىندا كوكتەمنىڭ باسىندا قولدانىستا بولعان قۇرىلعى توزىپ، ىسكە العىسىز كۇيگە ءتۇسۋى مۇمكىن بە؟ ۆەدومستۆوعا 20 كۇن بۇرىن جولدانعان حاتىمىزعا جاۋاپ الا الماي وتىرعاندا بۇل ساۋالدى جولداۋ اۋزى كۇيسە دە ۇرلەمەي ىشەتىننىڭ كەرى بولار. سول سەبەپتى مينيسترلىككە ماسەلەنى اشىق اقپارات بەتىندە جولداۋدى ءجون كوردىك. باستاپقىداعى مولشەرىنەن ازايىپ، جۇزدەگەن داناسى وسى ايدا ساتىپ الىنعان قۇرىلعىنىڭ سانى نەگە كۇماندى؟

وججق اپپاراتتارى ماقساتىنا، پاتسيەنتتىڭ جاسىنا، جۇمىس مەحانيزمىنە قاراي ءارتۇرلى بولىپ كەلەدى. دەگەنمەن ونى ادامنىڭ تىنىستاۋى قيىنداپ، كومىرقىشقىل گازىن شىعارۋدا، اۋا جەتىسپەگەندە، ياعني ناۋقاستىڭ جاعدايى كۇردەلەنگەندە  قولدانۋ – ادامنىڭ ءومىرىن ساقتاۋعا تاپتىرماس مۇمكىندىك. قۇرىلعىنىڭ كلينيكاعا ارنالعان جاي ءتۇرىنىڭ ءوزى كەمىندە 15-7 ميلليون تەڭگە تۇرادى. سوندىقتان دا جاساندى جەلدەتۋ اپپاراتى اسا باعالى، تاپشى قۇرالدىڭ قاتارىنا كىرەدى.

“The Qazaq Times”