ۋكراينا قىرىمدا، دونباسس ايماعىندا اسكەري شەرۋ وتكىزگەن رەسەيدى حالىقارالىق قۇقىق پەن مينسك كەلىسىمدەرىن بۇزدى دەپ ايىپتادى. بۇل تۋرالى ۋكراينا ءسىم رەسەي جولدانعان ءتيىستى نارازىلىق نوتاسىندا ايتىلعان.

ۋكراينا ءسىم ءباسپاسوز قىزمەتى: «24 ماۋسىمدا رەسەي فەدەراتسياسىنىڭ ۋاقىتشا جاۋلاپ العان قىرىم اۆتونوميالى رەسپۋبليكاسى مەن سەۆاستوپول قالاسىندا ءناتسيزمدى جەڭۋدىڭ 75 جىلدىعىنا وراي وتكىزگەن اسكەري شەرۋ زاڭعا قايشى دەپ سانايمىز. رەسەي تارابى ۋكراينانىڭ قولدانىستاعى زاڭناماسى مەن حالىقارالىق قۇقىق تالاپتارىن، سونىڭ ىشىندە بۇۇ باس اسسامبلەياسىنىڭ 2014 جىلعى 27 ناۋرىزداعى «ۋكراينانىڭ اۋماقتىق تۇتاستىعى» تۋرالى قارار ەرەجەلەرىن بۇزدى»، – دەپ حابارلادى.

سونىمەن قاتار قىرىم مەن دونباستاعى شەرۋلەرگە بايلانىستى كيەۆ ماسكەۋدى «ەكىجاقتى قاتىناستاردىڭ ءورشۋىن جالعاستىرىپ، مينسك كەلىسىمىن ورەسكەل بۇزدى. ەۋروپالىق قاۋىپسىزدىككە ەلەۋلى قاتەر توندىرەتىن قىرىمدى اسكەريلەندىرۋ ساياساتىن جۇرگىزدى» دەپ ايىپتادى. كيەۆ ماسكەۋدەن «ۋكراينانىڭ مەملەكەتتىك ەگەمەندىگى مەن اۋماقتىق تۇتاستىعىنا قارسى حالىقارالىق زاڭسىز ارەكەتتەردى دەرەۋ توقتاتۋدى» تالاپ ەتتى.

2014 جىلى ناۋرىزدا ۋكرايناداعى ساياسي داعدارىس پەن مەملەكەتتىك توڭكەرىستەن كەيىن قىرىمنىڭ جوعارعى كەڭەسى جانە سەۆاستوپول قالالىق كەڭەسى رەسپۋبليكانىڭ تاۋەلسىزدىگى تۋرالى دەكلاراتسيا قابىلدادى. 16 ناۋرىزدا قىرىم مەن سەۆاستوپولدە رەفەرەندۋم ءوتىپ، 18 ناۋرىزدا ۆلاديمير پۋتين اتالعان ايماقتاردى رەسەي قۇرامىنا قوسۋ تۋرالى كەلىسىمدەرگە قول قويدى. اقش، ەۋروپانىڭ بىرقاتار ەلدەرى، تۇركيا جانە ۋكراينا قىرىمدى رەسەي ايماعى رەتىندە مويىندامايدى.

"The Qazaq Times"