ماكرون مەن شي ءبىر جارىم ساعات سويلەستى. فوتو: Reuters.

فرانتسيا پرەزيدەنتى ەممانۋەل ماكرون وتكەن جۇمادا (5 ماۋسىم) قىتاي باسشىسى شي جينپيڭمەن تەلەفون ارقىلى سويلەسىپ، گونكونگ ماسەلەسىنە قاتىستى فرانتسيانىڭ ۇستانىمىن جەتكىزگەن. فرانتسيا پرەزيدەنت سارايىنىڭ رەسمي وكىلى بۇل تۋرالى سەنبى كۇنى "رەيتەر" اگەنتتىگىنە بەرگەن مالىمدەمەسىندە ايتقان. 

گونكونگتىڭ ەركىندىگى تۋرالى الەمدە الاڭداۋشىلىق كۇشەيىپ تۇرعان تۇستا فرانتسيا مەن قىتاي باسشىلارى تەلەفون ارقىلى ءبىر جارىم ساعاتتان استام ۋاقىت سويلەسكەن. پرەزيدەنت ماكرون سويلەسۋ كەزىندە گونكونگ ماسەلەسىنە باسا نازار اۋدارىپ وتىرعانىن جەتكىزگەن. سونداي-اق، قىتاي ۇكىمەتىن ء"بىر ەل، ەكى جۇيە" ءپرينتسيپىن جالعاستى ساقتاۋعا شاقىرعان. بۇل مالىمەتتى "رەيتەر" اگەنتتىگى  ەليسەي سارايىنىڭ قىزمەتكەرىنىڭ مالىمەتىنە سىلتەمە جاساي وتىرىپ حابارلاعان. الايدا،  ەليسەي سارايىنىڭ رەسمي مالىمدەمەسىندە ەكى ەل باسشىسىنىڭ سويلەسۋى تۋرالى ايتىلعانىمەن، گونكونگ تاقىرىبىنىڭ تالقىعا تۇسكەنى تۋرالى ەش مالىمەت بەرىلگەن جوق. 

بەيجىڭ بيلىگىنىڭ ۇلتتىق قاۋىپسىزدىك جونىندەگى جاڭا زاڭ جوباسىنا قاتىستى شەشىمى،  گونكونگ پەن تايۋان (تايۆان) قانا ەمەس، الەم ەلدەرىندە ءتۇرلى سىنعا ۇشىرادى. بىرقاتار ەل ءبيلىنى قىتايدىڭ جاڭا زاڭ جوباسى گونكونگتىڭ ەرەكشە اۆتونوميالى ايماق رەتىندەگى قۇقىعىن شەكتەپ، الەمدىك ماڭىزدى قارجى ورتالىعى ستاتۋسىنا نۇقسان كەلتىرەدى دەپ الاڭدايدى.

قىتايدىڭ اعىلشىن تىلىندەگى ىقپالدى باسىلىمى Global Times اتالمىش زاڭ جوباسىن گونكونگ قۇقىعىن شەكتەۋدىڭ ورنىنا، ونداعى داعدارىستى شەشۋدىڭ، تارتىپسىزدىكتەردى رەتكە كەلتىرىپ، جاراسىمدى قوعام قۇرۋدىڭ العى شارتى رەتىندە كورسەتكىسى كەلەدى. اتالعان باسىلىمنىڭ ايتۋىنشا جاڭا زاڭ جوباسى كەرىسىنشە ء"بىر ەل، ەكى جۇيە" ءپرينتسيپىن نىعايتا تۇسەدى ەكەن. بىراق، تايۋان مەن گونكونگتىڭ وزىندە جاڭا زاڭعا دەگەن قارسىلىق، نارازىلىق كۇشەيىپ تۇر. بۇدان بۇرىن بريتانيا پرەمەرى بوريس جونسون دا گونكونگ ماسەلەسىندە بەيجىڭنىڭ ءوز مىندەتتەرىن تولىق وتەۋىن تالاپ ەتىپ، مالىمدەمە جاساعان ەدى. 

ايتا كەتۋگە تۋرا كەلەدى، ەليسەي سارايىنىڭ ءباسپاسوز قىزمەتى جاساعان مالىمدەمەدە، فرانتسيا مەن قىتاي باسشىلارى ەكى ەل قاتىناسىنان تارتىپ، كوروناۆيرۋس پاندەمياسىنا قارسى كۇرەس جونىندە تالقىلاعان. بۇل رەتتە ەكى ەل باسشىسى ددۇ-نىڭ ماڭىزدىلىعى تۋرالى دا پىكىر الماسقان. تاراپتار اقش پرەزيدەنتىنىڭ دەنساۋلىق ساقتاۋ ۇيىمى تۋرالى پىكىرىنە كەلىسپەيتىندەرىن دە جەتكىزگەن. ەستەرىڭىزدە بولسا، بۇدان بۇرىن اقش پرەزيدەنتى پاندەميا كەزىندەگى ددۇ-نىڭ قىزمەتتەرىن سىنعا الىپ، اتالمىش ۇيىمنان شىعاتىنىن دا ەسكەرتكەن.

“The Qazaq Times”