سولتۇستىك كورەيا باسشىسى حيميا وندىرىستىك زاۋىتىنىڭ اشىلۋىندا. فوتو: Reuters.

سولتۇستىك كورەيا ليدەرى كيم جوڭ ۋن (كيم چەن ىن) بيلەۋشى پارتيانىڭ جينالىسىندا حيميا سالاسىن قامتىعان ەكونوميكالىق جوبالاردى تالقىلاعان. بۇل تۋرالى سول ەلدەگى ورتالىق اقپارات اگەنتتىگى حابارلاعان. 

سولتۇستىك كورەيانىڭ يادرولىق باعدارلاماسىنا قارسى سانكتسيالار ەل ەكونوميكاسىن القىمنان الىپ تۇرعان تۇستا، الەمدى شارپىعان پاندەميا دا كحدر ەكونوميكاسىنىڭ بولاشاعىن بۇلدىراتا ءتۇستى. ال، سولتۇستىك كورەيا بيلىك پارتياسىنىڭ ەكى كۇندىك وتىرىسىندا «ۇلتتىق ءوزىن-ءوزى قامتاماسىز ەتۋ ەكونوميكاسىن ودان ءارى دامىتۋ جانە ادامداردىڭ ءومىر ءسۇرۋ دەڭگەيىن جاقسارتۋ بارىسىندا تۋىندايتىن نەگىزگى ماسەلەلەر» دەگەن تاقىرىپتار تالقىلانعان.

Reuters اگەنتتىگىنىڭ حابارلاۋىنشا، كحدر بيلەۋشىلەرى اتالعان جيىندا «حيميا ونەركاسىبى – ۇلتتىق ەكونوميكانىڭ ماڭىزدى باعىتى» دەپ بىرنەشە رەت اتاپ وتكەن. ورتالىق اقپارات اگەنتتىگى كيم جوڭ ۋننىڭ سوزىنە سىلتەمە جاساپ، تىڭايتقىشتار ءوندىرىسىنىڭ قۋاتىن ارتتىرۋعا باسىمدىق بەرۋدى تاپسىرعان.

ەستەرىڭىزدە بولسا، سولتۇستىك كورەيا باسشىسىنىڭ دەنساۋلىعىنا قاتىستى ءتۇرلى الىپ-قاشپا اڭگىمەلەردەن كەيىن، 1 مامىردا كيم جوڭ ۋن ەلدەگى حيميالىق تىڭايتقىش زاۋىتىنىڭ اشىلۋ سالتاناتىندا بوي كورسەتكەن ەدى. جالپى، سولتۇستىك كورەيا باسشىسى سوڭعى بىرنەشە جىلدا شەتەلدىك ساپارلارعا ءجيى شىقتى. بۇل ونىڭ دەنساۋلىعىنا بايلانىستى ءتۇرلى اڭگىمەلەردىڭ ورشۋىنە دە سەبەپ بولعان. ونىڭ ۇستىنە ونىڭ ناۋقاستانعانى تۋرالى مالىمەتتەر الەمدە كوروناۆيرۋس تاراپ جاتقان كەزگە تۇس كەلدى. بىراق، سولتۇستىك كورەيا ەلدە Covid-19 ەپيدەمياسى تابىلعانىن مالىمدەگەن جوق. بىراق، ەلدەگى اقپارات كوزدەرى اتالعان جۇقپالى اۋرۋدىڭ تارقاۋ مۇمكىندىگىن جوققا شىعارمادى.

“The Qazaq Times”