گەرمانيا ەكىنشى دۇنيەجۇزىلىك سوعىستان بەرى بولماعان داعدارىستى باستان كەشىپ جاتىر. ARD تەلەارناسىنا سۇحبات بەرگەن كانتسلەر انگەلا مەركەل وسىلاي دەپ مالىمدەدى.

داعدارىستان شىعۋ ماقساتىندا 130 ميلليارد ەۋرو بولىنەدى جانە ۇكىمەت بيزنەسكە قولداۋ كورسەتەدى. مەركەل سوزىندە: «ءبىز گفر تاريحىنداعى ەڭ اۋىر ەكونوميكالىق جاعدايدى باستان كەشىرىپ جاتىرمىز. ەكونوميكانى ىنتالاندىرۋ ءۇشىن كوپتەگەن شارا قابىلدانادى. شاعىن مەن ورتا بيزنەسكە جانە مادەنيەت سالاسىنا كومەك بەرۋدى كوزدەپ وتىرمىز. ەكونوميكانى تەزىرەك قالپىنا كەلتىرۋ ءۇشىن جارتى جىلعا قوسىلعان قۇن سالىعىنىڭ مولشەرىن قىسقارتۋدى شەشتىك. ويتكەنى سالىقتى ءبارى تولەيدى عوي. بۇل تۇتىنۋشىلارعا دا، جالپى بۇكىل ەكونوميكاعا وڭ اسەرىن تيگىزەدى»، – دەدى.

جوسپار بويىنشا، كارانتيننەن ەڭ قاتتى زارداپ شەككەن سالالارعا، اتاپ ايتقاندا تۋريزم مەن قوعامدىق تاماقتانۋ سالالارىنا جاردەم بەرىلەدى. بۇل ماقساتقا 25 ملرد ەۋرو ءبولۋ قاراستىرىلعان. سونداي-اق جارتى جىلعا قوسىلعان قۇن سالىعىنىڭ مولشەرى 19%-تەن 16%-كە ازايتىلادى. وتباسىداعى ءار بالاعا 300 ەۋرودان جاردەماقى تولەنەدى. ۇكىمەت بيزنەس پەن تۇرعىنداردىڭ جاعدايىن جاقسارتۋ ءۇشىن ەلەكتر قۋاتىنىڭ باعاسىن دا ارزانداتادى.

"The Qazaq Times"