قىتايلىق باعدارلامالاردى تازالاۋشى باعدارلامالار ءۇندىستاندا كەڭ قولدانىلا باستادى. فوتو: Marketing China

ءۇندىستان قىتايلىق باعدارلامالاردى انىقتاپ بەرەتىن جاڭا باعدارلاما جاساپ شىعاردى. اندرويد جۇيەسىندەگى زەردەلى تەلەفوندارعا ارنالعان باعدارلاما قىتايدا جاسالعان نەمەسە مەنشىك قۇقىعى قىتايلىقتارعا تيەسىلى بولعان باعدارلامالاردى انىقتاپ، ولاردى ۇيالى تەلەفوننان تازارتۋعا كەڭەس بەرەدى.

باعدارلاما Remove China Apps service دەپ اتالادى. ۇندىستانداعى بۇل جاڭالىق ءۇندى-قىتاي شەكارالىق جانجالىنان كەيىن جارىققا شىقتى. مامىر ايىندا قىتاي مەن ءۇندىستاننىڭ ونداعان شەكاراشىلارى اراسىندا جانجال بولىپ 4 ۇندىستاندىق، 7 قىتايلىق شەكارا اسكەرى جاراقات العان بولاتىن. بۇلاناي (گيمالاي) تاۋلارىنداعى جانە پامير ءۇستىرتى، كاشمير ماڭى، تيبەت ۇستىرتىندەگى ءۇندى-قىتاي شەكاراسىندا ءالى دە شەشىم تاپپاعان شەكارالىق داۋلار بار.

شەكارالىق جانجالدان كەيىن اتالعان پروگراممانى ميلليونداعان ۇندىستاندىق تەلەفوندارىنا جۇكتەگەن. قىتايلىق باعدارلامالارعا قارسى بۇل ارنايى باعدارلاما TikTok پەن Zoom باعدارلامالارىن دا وشىرۋگە كەڭەس بەرەدى. سەبەبى، Zoom كاليفورنيادا جاسالىپ شىققانىمەن ونى قىتايلىق كاسىپكەر ويلاپ تاپقان، ال TikTok باعدارلاماسىنا بەيجىڭدە ورنالاسقان  Bytedance كومپانياسى يەلىك ەتەدى. قازىر، ۇندىستانداعى الەۋمەتتىك جەلىلەردە TikTok پەن Zoom باعدارلامالارىن جويىپ، ونىڭ ورنىنا وتاندىق نەمەسە وزگە شەتەلدىك بالامالارىن قولدانۋ تۋرالى پىكىرتالاستار بولىپ جاتىر.

ماسەلە تەك قانا شەكارا داۋىندا ەمەس. الەۋمەتتانۋشىلاردىڭ پىكىرىنە سەنسەك، جاڭا كوروناۆيرۋس پاندەمياسى الەمدە سينوفوبيانى ءورشىتىپ، الەم مەن قىتاي قارىم-قاتىناسىن اشكەرەلەپ بەرگەن. ىندەت جايىلعالى بەرى الەمدە ونسىزدا كوپ ۋاقىتتان بەرى بىرتىندەپ اسقىنىپ كەلە جاتقان سينوفوبيا تىپتەن كۇش الدى. قىتاي الەمدە سينوفوبيانىڭ كۇشەيىپ كەلە جاتقانىن سەزەدى جانە وعان قارسى شارالار قولدانعان بولادى. سوڭعى ايلاردا قىتايدىڭ مەملەكەتتىك اقپارات اگەنتتىكتەرى ىقپالدى اعىلشىن ءتىلدى باسىلىمدى سىنعا الىپ، ولار "راسيزم مەن ديسكريميناتسياعا" جول بەرىپ وتىر دەپ ايىپتاعان حابارلار تاراتتى.

“The Qazaq Times”