بوريس دجونسون: بريتانيا گونكونگ حالقىن تاستاپ كەتپەيدى

«ۇلىبريتانيا گونكونگ حالقىن تاستامايدى». بۇنداي مالىمدەمەنى بريتان باس ءۋازىرى (پرەمەر-ءمينيسترى) بوريس جونسون جاسادى. ول مالىمدەمەسىندە: «ەگەر قىتاي تارابى گونكونگتا «بريتان-قىتاي بىرلەسكەن دەكلاراتسياسى» بويىنشا قىتايدىڭ حالىقارالىق مىندەتتەمەلەرىن بۇزاتىن قاۋىپسىزدىك زاڭىن قابىلدايتىن بولسا، ۇلىبريتانيا گونكونگ حالقىن ەلەۋسىز قالدىرا المايدى»، – دەدى.

بريتاندىق «تايمس» باسىلىمىنداعى پىكىرىندە جونسون: «گونكونگتىڭ تابىسقا جەتۋىنىڭ سەبەبى – ونىڭ حالقىنىڭ ەركىندىگىندە. ەگەر قىتاي ۇلتتىق قاۋىپسىزدىك تۋرالى زاڭنىڭ گونكونگ نۇسقاسىن قابىلداسا، بىرلەسكەن دەكلاراتسياداعى قىتايدىڭ مىندەتتەمەلەرىن تىكەلەي بۇزعان بولىپ ەسەپتەلەدى. «قىتاي-بريتان بىرلەسكەن دەكلاراتسياسى» بۇۇ ماقۇلداعان رەسمي كەلىسىم»، – دەدى.

ونىڭ ايتۋىنشا، قازىر حوڭكوڭ (گونكونگ) حالقى وزدەرىنىڭ ەركىن ءومىر سالتتارىنىڭ بۇزىلۋىنان الاڭداۋدا، ال قىتاي بۇل ايماقتى قايتارىپ العان كەزدە گونكونگ ازاماتتارىنىڭ ءومىر سالتىن ساقتاۋعا ۋادە بەرگەن. بەيجىڭ قابىلداعالى وتىرعان زاڭ ولاردىڭ كەلىسىمدى اشىقتان-اشىق بۇزۋى بولاتىنىن ەسكەرتكەن. «ەگەر قىتاي گونكونگ حالقى الاڭدايتىنداي باعىتتا قادام باساتىن بولسا، ۇلىبريتانيا جاي قاراپ وتىرا المايدى. ءبىز ءوز مىندەتتەرىمىزدى ورىندايمىز نەمەسە بالاما نۇسقالارىن ۇسىناتىن بولامىز»، – دەدى.

باس ءۋازىردىڭ مالىمدەمەسىنە قوسا، سەيسەنبى كۇنى ۇلىبريتانيانىڭ ۇلتتىق قاۋىپسىزدىك كەڭەسى بريتان-قىتاي اراسىنداعى قارىم-قاتىناستى «تۇزەتۋگە» كەلىستى.

ايتا كەتۋ كەرەك، 1997 جىلى بريتانيا قىتايمەن ورتاق دەكلاراتسيا قابىلداي وتىرىپ، 100 جىل وتارلاعان گونكونگتى قىتايعا قايتارعان. قىتاي اتالعان ەرەكشە اكىمشىلىك ايماقتى قايتارىپ الا وتىرىپ، گونكونگتىڭ كاپيتاليستىك جولمەن جۇرۋىنە، دەموكراتيالىق قۇقىقتارىنا قول سۇقپاۋعا، ەرەكشە اۆتونوميالى ايماق رەتىندە مامىلە جاساۋعا ۋادە ەتكەن.

“The Qazaq Times”