فوتو: www.adweek.com

اقش-تا باستالعان «Black lives matter» قوزعالىسى ەۋروپا مەن اۋستراليادا دا ءوتتى.

گەرمانيا، نيدەرلاندى، ۇلىبريتانيادا جۇزدەگەن ادام افروامەريكالىق دجوردج فلويدتىڭ قاتىگەزدىكپەن ولتىرىلگەنىن ايتىپ، ميننەوپوليس ەرەۋىلشىلەرىن قولداۋعا شىققان. ۇيىمداستىرۋشىلار بۇل وزەكتى ماسەلەنى جاھان بولىپ، بىرگە شەشۋ كەرەك دەيدى. ەۋروپاداعى اكتسيالار بەيبىت تۇردە ءوتتى.

25 مامىردا ميننەاپوليس قالاسىندا 46 جاستاعى دجوردج فلويد پوليتسەي وكىلدەرىنىڭ كوز الدىندا جان تاپسىرعان. دۇكەن كاسسيرى مارقۇم جالعان بانكنوتپەن ەسەپ ايىرىسپاق بولدى دەگەن ۋاجبەن پوليتسيا شاقىرادى. ارتىنشا وقيعا ورنىنا كەلگەن ءتارتىپ ساقشىلارى كۇدىكتىنىڭ قولىنا كىسەن سالعاننان كەيىن وفيتسەرلەردىڭ ءبىرى ونىڭ جەلكەسىن اياعىمەن 7 مينۋتتاي باسىپ تۇرعان. داۋىسى قارلىققان افروامەريكالىق ءوزىنىڭ دەم الا الماي جاتقانىن ايتادى، بىراق وعان پوليتسەيلەر قۇلاق اسپاعان. وسىدان كەيىن «مەن تۇنشىعىپ قالدىم!» تىركەسى شەرۋدىڭ باستى ۇرانىنا اينالدى.

ءبىر اپتاعا جۋىق ۋاقىت وتسە دە، امەريكاداعى قاقتىعىس ءالى باسىلعان جوق. سەنت-لۋيس قالاسىنداعى ەرەۋىل كەزىندە 4 پوليتسيا قىزمەتكەرى جاراقاتتانعان. قازىر ءتورت ساقشى دا اۋرۋحانادا جاتىر. ەرەۋىل كەزىندە 200-گە جۋىق ادام پوليتسەيلەرگە پيروتەحنيكالىق زات پەن تاس لاقتىرعان. ال كۋاگەرلەردىڭ سوزىنشە، كەش باتىسىمەن نارازى جۇرت دۇكەندەردى قيراتا باستاعان.

"The Qazaq Times"