تايۋان پرەزيدەنت انت بەردى. فوتو: NYTimes.

بۇگىن تۇستەن بۇرىن تساي يىڭۆىن حانىم تايۋان (تايۆان) پرەزيدەنتى رەتىندە انت بەرىپ، ەكىنشى وكىلەتتى مەرزىمىن رەسمي تۇردە باستادى. بىلتىر بەيجىڭ تارابىنىڭ قارسىلىعى مەن قىسىمدارىنا قاراماستان دەموكراتيالىق كۇشتەردىڭ وكىلى جانە ارالدىڭ دەربەستىگىن جاقتاۋشى تساي ينۆىن پرەزيدەنت سايلاۋىندا باسىم داۋىسپەن جەڭىپ شىققان.

سوڭعى كەزدەرى ونىڭ ۇكىمەتىنىڭ حالىقارالىق قاۋىمداستىق الدىنداعى بەدەلى ارتىپ كەلەدى. پاندەمياعا قارسى كۇرەستە تايۋان ۇكىمەتى تابىستى ناتيجەلەر كورسەتە الدى. قىتايمەن اراسىن 100 ميل قاشىقتىقتاعى تايۋان بۇعازى ءبولىپ جاتقان ارال حالقىنىڭ سانى 23 ميلليوننان اسادى. جاڭا كوروناۆيرۋس ينفەكتسياسى تايۋان مەن اقش-تا ءبىر كۇندە تىركەلگەن. الايدا، تايۋان ۆيرۋسقا شالدىققاندار سانى ەڭ از ەلدەردىڭ ءبىرى بولىپ قالدى. ەلدە 440 ادام عانا كوروناۆيرۋس ينفەكتسياسىن جۇقتىرعان جانە ونىڭ جەتەۋى قازا تاپقان. سونىمەن ءبىر ۋاقىتتا ينفەكتسيا تاراعان اقش-تىڭ جاعدايى بۇل كۇندە الەمگە بەلگىلى.

ءوز مالىمدەمەسىندە اقش مەم. حاتشىسى مايك پومپەو پرەزيدەنت تساي مەن ونىڭ ۇكىمەتىنىڭ ىندەتكە قارسى شارالارىن جانە ناتيجەسىن اسا جوعارى باعالاعان. ول مالىمدەمەسىندە پرەزيدەنت تساي تۋرالى: «تايۋانداعى دەموكراتيانىڭ وركەندەۋىنە ەتكەن قىزمەتى مەن جاساعان باتىل قادامى الەمگە شابىت بەردى»، – دەگەن بولاتىن.

بەيجىڭ تارابى پرەزيدەنت تسايدىڭ يناۋگۋراتسياسىن بىردەن سىنعا الدى. ايىپتاۋلاردىڭ اراسىندا بيلىك پارتياسى ىندەت جاعدايىن تايۋاننىڭ دەربەستىك ماسەلەسىن العا جىلجىتۋ ءۇشىن پايدالانىپ وتىر دەگەن سوزدەر دە بار. بەيجىڭنىڭ تايۆان مەملەكەتتىك ىستەر باسقارماسىنىڭ وكىلى ما سياوگۋان پىكىرىندە: «ولار تايۋان بۇعازىنداعى بەيبىتشىلىكتى بۇزۋ جانە ەپيدەميا ارقىلى تاۋەلسىزدىككە جەتۋ ءۇشىن سىرتقى كۇشتەرمەن بايلانىس جاساۋدا»، - دەگەن.

“The Qazaq Times”