شىمكەنتەگى اسكەري گارنيزون سوتى ارىستاعى جارىلىسقا بايلانىستى ءىستى قاراۋدى باستادى. فوتو: اشىق دەرەككوز

بەيسەنبى كۇنى شىمكەنتتىڭ اسكەري گارنيزون سوتىندا بىلتىر جازدا قوعامدا رەزونانس تۋدىرعان ارىستاعى ءتورتىشى جارىلىسقا قاتىستى سوت باستالدى.

14 مامىر كۇنى وتكەن سوت تىڭداۋىندا سۋديا سوتتالۋشىلار جانە ولاردىڭ قورعاۋشىلارىمەن تانىستى. سوت مەملەكەتتىك تىلدە وتۋىنە بايلانىستى بۇل ىسكە ورىس تىلىنەن اۋدارماشىلار دا شاقىرىلعان. «اسكەري ءبولىمنىڭ وق-ءدارى قويماسىندا قاۋىپسىزدىك ەرەجەسى ساقتالماعان، وق-ءدارى شامادان تىس كوپ جينالعان جانە ءورت ءسوندىرۋ جۇيەسىمەن قامتاماسىز ەتىلمەگەن» دەگەن ايىپپەن قوزعالعان ىستە ازىرگە 16 كۇدىكتى، 25 اۆدوكات، 1500-گە جۋىق جابىرلەنۋشى تىركەلگەن.

ايىپتالۋشى رەتىندە قاتىسقان 16 اسكەري ادامنىڭ قاتارىندا ارىس قالاسىنداعى اسكەري ءبولىم قىزمەتكەرلەرى دە، قورعانىس مينيسترلىگىنىڭ جوعارى لاۋازىمدى وفيتسەرلەرى دە بار.

ەلدەگى كارانتين رەجيمىنە بايلانىستى استاناداعى سوت زالىمەن ونلاين بايلانىس ورناتىلىپ، ىسكە قاتىستى ازاماتتارمەن تانىسۋ جۇرگىزىلدى. جاۋاپكەرلەر مەن ولاردىڭ قورعاۋشىلارىنىڭ كوپتىگى سونشالىق، شىمكەنتتەگى اسكەري گارنيزون سوتىندا ەكى زالعا ءبولىپ ورناتالاستىرىپ، بەينە كونفەرەنتسيا ارقىلى تىلدەستى. 16 سوتتالۋشىعا تاعىلعان ايىپ ءار ءتۇرلى. 448 تومنان تۇراتىن قىلمىستىق ىستە اسكەريلەرگە قىزمەتىنە سالعىرتتىق، وق-ءدارى پايدالانۋ مەن ونى قولدانۋداعى تالاپتاردى ساقتاماۋ، سەنىپ تاپسىرىلعان مۇلىكتى تالان-تاراجعا سالۋ سياقتى ايىپ تاعىلىپ وتىر.

بىلتىر 24 ماۋسىم كۇنى ارىستاعى اسكەري ءبولىمنىڭ وق-ءدارى ساقتايتىن قويماسىندا جارىلىس بولىپ، سالدارىنان قالا حالقى بوسىپ كەتكەن ەدى. ادامي فاكتوردان بولۋى ىقتيمال اپاتتان 3 ادام مەرت بولىپ، 30-ى جاراقات العان. سونداي-اق  9 مىڭنان استام نىسان ءبۇلىنىپ، 500-دەي ءۇي جارامسىز بولىپ قالعان. رەسمي اقپاراتقا سۇيەنسەك، جويقىن جارىلىستىڭ زاردابى 143 ملرد تەڭگەگە شىعادى.

"The Qazaq Times"