قازاقستان ەلشىسى دارحان كالەتاەۆ ۋكراينا پرەزيدەنتى ۆلاديمير زەلەنسكيگە سەنىم گراموتالارىن تاپسىردى.

قر ءسىم ءباسپاسوز قىزمەتىنىڭ حابارلاۋىنشا، ەلشى ءراسىم اياسىندا وتكەن سۇحبات بارىسىندا قازاقستاننىڭ ۋكراينامەن كەڭ اۋقىمدى ماسەلەلەر بويىنشا پراگماتيكالىق ىنتىماقتاستىقتى دامىتۋدى تالقىلاعان.

سونىمەن بىرگە ول ەكى ەل حالىقتارىنىڭ تىعىز تاريحي بايلانىسى مەن ەكى مەملەكەت اراسىنداعى ساۋدا-ەكونوميكالىق، مادەني-گۋمانيتارلىق ىنتىماقتاستىقتىڭ ماڭىزدى الەۋەتىن اتاپ ءوتتى.

ۋكراينا — قازاقستاننىڭ شىعىس ەۋروپاداعى ءىرى سەرىكتەس مەملەكەتى. 2018 جىلى قازاقستاننان ۋكرايناعا تاسىمالداناتىن سۇيىتىلعان گازدىڭ كولەمى رەكوردىق كورسەتكىشتى جاڭارتتى. وتكەن جىلى تىكەلەي كەلىسىم ارقىلى تاسىمال كولەمى 260 مىڭ توننانى قۇراعان. وسىلايشا قازاقستاندىق ءونىم ۋكرايناداعى اۆتو-گاز داعدارىسىن ەڭسەرىپ، باعا ساياساتىن تۇراقتى ۇستاپ تۇرۋعا مۇمكىندىك بەرىپ تۇر. ۋكراينادا سۇيىتىلعان گازعا سۇرانىس جىل سايىن ارتىپ كەلەدى، سوندىقتان ەكى ەل اراسىنداعى گاز ساۋدا اينالىمىنىڭ كولەمى وسى جىلى دا كوبەيە تۇسپەك. 2018 جىلى ەكى ەل اراسىنداعى تاۋار اينالىمى 1,5 ملرد دوللارعا جەتكەن.

"The Qazaq Times"